Su Natatalanged a Kapapanaban nu Kadenan a Mapulu kanu Datu a 'Bpangurban
Sengal a inisulat'u Daud.
110
Su Kadenan a Mapulu na nia nin pidtalu kanu Mapulu ku na“Ayan ka sia tampal kanu kawanan ku
taman sa pasugiuden ku su manga kuntela nengka kanu palad'u ay nengka.”
2 Na iganat sa Zion na pagkauladen nu Kadenan a Mapulu su kadatu nengka.a
Kandatuan nengka su manga kuntela nengka.
3 Na kanu timpu nu kambunua nengka
na su manga taw nengka na inggihad'ilan su ginawa nilan sa kaamung'ilan sa leka
lu kanu suti a manga palaw.
Na su bagel'engka na 'bpagiseg uman mapita.
Na su manganguda nengka na lemu sa leka a mana bun su manga namug kanu mapita-pita.
4 Na inibpasad'u Kadenan a Mapulu i di a benal edsalin su itungan nin sa nia nin kadtalu na “Seka i mangurban taman sa taman a mana su kinabaluy kanu Milkisidik sa kabpangurban.”
5 Na su Kadenan a Mapulu na sia kanu kawanan nengka a pedtapid sa leka.
Na u mauma den su gay a kapagedam'in kanu lipunget'in na binasan nin su manga datu.
6 Kukumen nin ka siksan nin su manga bangsa,
penun nin sa bangkay su lupa;
lupet-lupeten nin su manga ulu nilan sia kanu liwawaw nu dunia.
7 Ugaid'a su Mapulu ku a datu na minem kanu lawas'a ig kanu ligid'u lalan
tembu mangiseg su kabagel'in taman sa manaban sekanin.