Su Pangeni-ngeni nu Taw a Sinenditan sa dikena Benal
Lu i nia pakatumpa kanu 'gkaunutan nu pasesengal. Su Sengal a nia na inisulat'u Daud.
109
Hu Kadenan a pebpugin ku, sawal ka su kapedtawag ku sa leka sa tabang.2 Kagina su manga daluaka enggu budtuden a manga taw na 'bpanila-tilan aku nilan,
'bpamedtalu silan sa kabudtud sungkang sa laki.
3 Nakabalibet silan sa laki a pakasik sa atay su kangadtalu nilan,
pegkuntelan aku nilan sa dala sabap'in.
4 Nia nilan inisuli kanu kapegkalimu ku kanilan na kabpanendit'ilan sa laki
ugaid'a apia ka maitu na ibpangeni-ngeni ku bun silan!
5 Nia nilan ipedsuli kanu kapianan ku kanilan na mawag,
pedsulian nilan sa kapegkabensi su kapegkalimu ku kanilan.
6 Nia nilan pedtalun na “Metad tanu sa taw a dupang a makasungkang sa lekanin
a makadtindeg a semendit lun lu kanu salimbuten a 'bpangukum.
7 Na sia kanu kakukum lun na sugaten sekanin sa kawagib
enggu mabaluy a dusa nin su manga pangeni-ngeni nin.
8 Pangeni-ngenin tanu i mangagan bu i gay nin sia sa dunia
enggu su galebekan nin na kuan nu ped a taw.
9 Su manga wata nin na kaawan na ama
enggu su kaluma nin na mabalu.
10 Su manga wata nin na apia endaw den makabpawang enggu mamangeni bun den,
pamugawn silan kanu pegkalebenan nilan a nageba den!
11 Panguan nu manga nautangan nin su langun nu kaaden nin
enggu panguan nu manga lapu su langun nu napantiali nin.
12 Pangeni-ngenin tanu i apia sakataw na dala malimu lun
enggu dala malat i nanam'in lun kanu nailu a manga wata nin.
13 Mamamatay bun su manga muliataw nin
ka enggu su ngala nin na di den katawan nu manga temundug pan a manga taw.
14 Pangeni-ngenin tanu i di kalipatanan nu Kadenan a Mapulu su manga kabaladusan nu manga kalukesan nin
enggu di mapunas su manga kabaladusan nu ina nin.
15 Di ampunen nu Kadenan a Mapulu su kabaladusan nu manga lukes'in
taman sa mapunas den silan sa kalendeman sia sa dunia.
16 Kagina dala demun nakagkapia nin kanu ped a taw.
Pinamungkaidanan nin su miskinan enggu su pamakanasisita a manga taw
enggu pinangimatayan nin su manga taw a naawan den na inam.
17 Nia nin kalilinian na kasinta kanu ped,
na pangeni-ngenin tanu i muli sa lekanin su entu a sinta nin.
Di nin kalilinian i kapalihalan su ped,
na pangeni-ngenin tanu i di bun sekanin kapalihalan.
18 Su kabpaninta nin na da den pinda nin a mana su balegkas a lalayun nin pembalegkasen,
na pangeni-ngenin tanu i semenep kanu lawas'in su entu a mana ig
enggu mana lana a pedsenep kanu manga tulan nin.
19 Na namba ka su sinta nin na mabaluy a mana ginis a makaputus sa lekanin
enggu mana sabitan a nakadsabitan sa lekanin kanu uman-uman gay.”
20 Hu Kadenan a Mapulu, nakineg'engka su langun na ipedsendit'ilan sa laki.
Na pangeni-ngenin ku i maitu ba i isiksa nengka kanu manga taw a nan
a pedtalu sa laki sa mawag.
21 Ugaid'a seka, Hu Kadenan ku a Kadenan a Mapulu,
tabangi aku sabap kanu kabadtugan nu ingala nengka;
ilipuas aku nengka sabap kanu sangat a kakalimu nengka a sangat i kapia nin.
22 Kagina saki na dala 'gkagaga nin enggu pakanasisita
enggu sangat a napalian su atay ku.a
23 Na mana mangagan den mapupus su umul ku a mana su alung-alung a 'gkadadag kanu magabi;
mana aku tapudi a pakaledtu amaika 'gkakuyung su nadtimpawan nin.
24 Su manga aleb ku na pegkalubay den sabap kanu kapedtigkel ku sa di kapegkan;
su lawas ku na sangat den a migkagasa.
25 Na pedtakudin aku nu manga taw a 'bpanendit sa laki;
na amaika 'gkailay aku nilan na 'bpangiling-kiling silan.
26 Hu Kadenan a Mapulu a Kadenan ku, tabangi aku pan!
Ilipuas aku nengka sia luyud kanu sangat a kakalimu nengka
27 asal'a katawan nu manga kuntela ku i su lima nengka demun
i minggula sa nia ba.
28 Na apia man idsinta aku nilan ugaid'a mana i seka na palihalai aku nengka.
Pagkaya ka su 'bpamungkaid sa laki!
Ugaid'a saki a panunugun nengka na pagkagalaw ka.
29 Su 'bpamanendit sa laki na ibaus'engka kanilan su kayayan;
naputus silan nu kanilan demun a kayayan a mana manta a nakaputus kanilan.
30 Na pugin ku seka a Kadenan a Mapulu sa senep sa atay,
pugin ku seka sia kanu luk'u madakel a taw a pedsimba sa leka.
31 Ka pedtindeg ka man kanu kawanan nu pamakanasisitab
ka enggu nengka silan makalipuas kanu pedsugat kanilan sa kawagib sa kapatay.