Su Kapugi enggu su Kapangeni-ngeni sa Kapanaban
Su Sengal a nia na inisulat'u Daud.
108
Hu Kadenan, pedsalig aku sa leka sa senep sa atay,edsengalan ku seka sa sengal a senep kanu atay ku.
2 Gemedam aku unan pan nu kasebang'u senang ka mapauni sa palabuni-bunian a alpa enggu kutiapi a pugi sa leka.
3 Hu Kadenan a Mapulu, pebpugin ku seka sia kanu manga bangsa
enggu pedsengal aku sa pugi sa leka sia kanu madakel a taw.
4 Kagina su sangat a kakalimu nengka na nakalampas pan kanu langit;
su katidtu nengka na nakasugku kanu kawang-kawangan.
5 Hu Kadenan, ipailay nengka su kabarakat'engka san sa sulega,
ipailay nengka su sigay nengka kanu lusud'u dunia.
6 Pakikineg aku nengka pan enggu tabangi kami sia kanu kapegkagaga nengka
ka enggu makalipuas su manga ipegkalimu nengka.
7 Na nia inibpasad'u Kadenan lu kanu suti a walay nin na
“Manaban aku man, baden ku su dalepa a Sikim
taman sa embad-baden ku su kadatalan nu Sukut ka ipangenggay ku kanu manga taw ku.
8 Su dalepa a Giliad na laki, su Manasi na laki bun,
su dalepa a Ipraim i mabaluy a kapasitia ku,
su dalepa a Yahuda i mabaluy a tungkedb ku.
9 Su dalepa a Muab i mabaluy a palanggana a 'bpamuanawanc ku
enggu su dalepa a Idum i mabaluy a 'bpagidtugan ku kanu talumpa ku.d
Na ilalis ku su kapanaban ku kanu manga taw a Pilistin.”
10 Na entain i makapananggit sa laki kanu inalad a siudad?
Entain i temutulu sa laki kanu dalepa a Idum?
11 Hu Kadenan, ngintu, inikias kami nengka den?
Ngintu, di nengka den tapiden su manga sundalu nami kanu pembunuan?
12 Hu Kadenan, tapid kami nengka sa kambunua sungkang kanu manga kuntela nami
ka da man katagan nin su tabang'u manusia.
13 Na sia kanu tabang'engka na manaban kami,
seka man i mapalusak kanu manga kuntela nami.