Ikalima a Libelu
(Sengal 107—150)
Su Kadsukul-sukul kanu Kalipuas kanu Madakel a Kasimuketan
107
Edsukul-sukulan tanu su Kadenan a Mapulu ka sekanin na sangat i kapia nin,su sangat a kakalimu nin na taman sa taman.
2 Na su sekanu a inilipuas'u Kadenan a Mapulu
na ipayag'u i inilipuas kanu nin kanu manga kuntela nu.
3 Linimud kanu nin ebpun kanu ped a manga bangsa
iganat sa sebangan taman sa sedepan,
iganat sa ilud taman sa laya.
4 Su ped sa lekanu na mindadalaug kanu tawan-tawan a dalepa
a di nu 'gkatuntul su lalan a ibpawang kanu siudad a kagkalebenan nu.
5 Nangagutem kanu enggu pamakainum a benal,
'gkangalubayan den i manggiginawa nu.
6 Daka nakapananawag kanu kanu Kadenan a Mapulu sabap kanu entu a kapasang'u 'gkatamanan nu,
na inilipuas kanu nin mambu kanu entu a kamalasayan nu.
7 Pinangunanan kanu nin kanu matidtu a lalan
taman sa nakauma kanu kanu siudad a kagkalebenan nu.
8 Na dait a edsukul-sukul kanu kanu Kadenan a Mapulu sabap kanu sangat a kakalimu nin
enggu kanu makagaip a manga pinggula nin kanu manusia.
9 Ka pinainum'in su pamakainum
enggu pinakausugan nin su 'gkangagutem.
10 Su ped sa lekanu na sia kanu sangat a kalibutengan,
nangabilanggu a sinangkalian sa putaw
11 kagina sinungkang'ilan su manga kadtalu nu Kadenan a Mapulu sa Langun
enggu inikias'ilan su entu.
12 Tembu pinakapasangan nin silan sa mangaugat a galebek;
namakagebpa silan ugaid'a dala nakatabang kanilan.
13 Daka nakapananawag silan kanu Kadenan a Mapulu sabap kanu entu a kapasang'u 'gkatamanan nilan,
na inilipuas'in mambu silan kanu entu a kamalasayan nilan.
14 Na iniawa nin silan kanu sangat a kalibutengan
enggu tinebped'in su sangkali a putaw a nakaiket kanilan.
15 Na dait a edsukul-sukulan nilan su Kadenan a Mapulu sabap kanu sangat a kakalimu nin
enggu kanu makagaip a manga pinggula nin kanu manusia.
16 Ka gineba nin su manga pintuan a galang
enggu tinebped'in su manga putaw nu bilangguan.
17 Su ped kanilan na nangababal sia kanu kapedsungkang'ilan,
nangalasay silan sabap kanu manga kabaladusan nilan.
18 Di den silan malilini keman sa apia ngin a pegken,
masupeg den silan kanu kapatay.
19 Daka nakapananawag silan kanu Kadenan a Mapulu sabap kanu entu a kapasang'a 'gkatamanan nilan,
na inilipuas'in mambu silan kanu entu a kamalasayan nilan.
20 Inipapait'in su kadtalu nin kanilan enggu migkapia mambu silan;
inilipuas'in silan kanu nanget a kabinasan.
21 Na dait a edsukul-sukul silan kanu Kadenan a Mapulu sabap kanu sangat a kakalimu nin
enggu kanu makagaip a manga pinggula nin kanu manusia.
22 Na dait a 'gkurban silan sa kadsukul-sukul sa lekanin,
ipayag'ilan su manga pinggula nin a unut su kadsengal lun sa aden kagalaw nin.
23 Su ped sa lekanu na mindadalayag a namageda sa manga kapal,
'bpamendagang lu kanu manga pantalan.
24 Na nailay nilan su manga pinggalebek'u Kadenan a Mapulu,
su mamakagaip a pinggalebek'in kanu kadaleman nu lagat.
25 Ka sia kanu kinasugu nin kanu sambel, na migkabandes su sambel
enggu migkasela a benal su bagel'u lagat
26 tembu su kapal na nakapulu kanu kawang-kawangan, entu pan ka nakadadsang taman kanu kadaleman,
na kinukuk silan na gilek kanu entu a mapasang a 'gkatala nilan.
27 Nakandulay-dulay silan a mana silan mininem sa makalangut,
su kategelan nilan sa kandadalayag na dala nilan mausal.
28 Daka nakapananawag silan kanu Kadenan a Mapulu sabap kanu entu a kapasang'u 'gkatamanan nilan,
na inilipuas'in mambu silan kanu entu a kamalasayan nilan.
29 Na pinatelen nin su mabandes a sambel
tembu lineminaw su lagat.
30 Daka nangagalaw silan kanu kinalinaw nu lagat,
na pidtapik'in silan kanu pegkiugan nilan a pendungguan nilan.
31 Na dait a edsukul-sukul silan kanu Kadenan a Mapulu sabap kanu sangat a kakalimu nin
enggu su makagaip a manga pinggula nin kanu manusia.
32 Na mapugi nilan sekanin sia kanu 'gkangalimud a manga taw a pedsimba kanu Kadenan
enggu sia kanu 'gkangalimud a 'gkangaunutan.
33 Na su Kadenan a Mapulu na magaga nin mapagkamala su pulangi
enggu su manga bualan na ig.
34 Su kalupan a 'gkasabpetan sa madakel na 'gkagaga nin i di kasabpetan
sabap kanu kawag'u galebek'u pegkaleben lun.
35 Magaga nin bun maluy su mamala a damapedtad sa pulangi;
su mamala a lupa na baluyn nin a bualan na ig.
36 Na lu nin ba pagkalebenen su 'gkangaguteman a manga taw
enggu mapatindeg silan lu ba sa siudad a kagkalebenan nilan.
37 Ipedsaud'ilan su manga uni lu kanu manga malinawag enggu 'bpamamula silan sa pamumulanen a ubas
taman sa makasabpet silan sa madakel a unga.
38 Na pebpalihalan nu Kadenan silan taman sa papegkadakelen nin silan;
papegkadakelen nin bun su manga pangangayamen nilan.
39 Na amaika pegkapaidu silan enggu papegkalabawan silan
na sia kanu kabpagumis kanilan enggu kanu manga lidu na ginawa nilan
40 na di 'gkasuatan nu Kadenan su 'gkangaunutan a 'bpagumis kanilan.
Papendadalaugen nin silan kanu tawan-tawan a dalepa
a di 'gkatawan u endaw i manga lalan nilan.
41 Ugaid'a ibpelipuas'in su manga pakatala sa kamalasayan,
papembuad-buaden nin su sakambinabatan nilan a mana den kadakel'u manga bili-bili.
42 Na 'gkailay nu manga taw a matidtu su entu a pinggula nu Kadenan enggu nangagalaw silan.
Na su manga taw a dupang na namakatelen edtalu.
43 Na su manga balaitungan a manga taw na dait a 'bpagitungen nilan sa mapia su entu
enggu itagu nilan sa ginawa su sangat a kakalimu nu Kadenan a Mapulu.