Su Kinapangumpaya nu Israil kanu manga Kabaladusan nilan
106
Pugin su Kadenan a Mapulu!Edsukul-sukulan tanu su sekanin a Kadenan a Mapulu, ka sangat man i kapia nin;
su sangat a kakalimu nin na taman sa taman.
2 Entain ba man i makapayag kanu kabarakatan a pinggula nu Kadenan a Mapulu
atawa ka entain i makapugi lun sa talutup a pugi?
3 Mapia den a benal kanu taw a penggulalan kanu ngin i wagib
enggu penggalebek sa matidtu kanu langun na kutika.
4 Hu Kadenan a Mapulu, 'gkakalendem aku nengka amaika edtabangan nengka su manga taw nengka;
tabangi aku nengka bun amaika ilipuas'engka den silan.
5 Isugut'engka a kaumunan aku nu kapegkapia nu manga taw a pinamili nengka,
makadsisigalaw aku sia kanu kanggalaw-galaw nu bangsa nengka
ka enggu aku makapugi sa leka kaped'u manga taw a mana nengka pusaka.
6 Na sekami enggu su manga katupuan nami na nakandusa man;
nakanggula kami sa limban, sangat man i kawag'u pinggula nami.
7 Na kanu lu pan sa Egypt su manga katupuan nami
na da nilan ipamamantag su manga makagaip a pinggula nengka;
da nilan 'gkakalendema su 'bpamelapay a sangat a kakalimu nengka,
ka nia pan mula na sinemungkang silan sa leka kanu lu pan silan kanu Maliga a Lagat.
8 Ugaid'a seka, Hu Kadenan a Mapulu na inilipuas'engka bun silan ka enggu mapugi su ingala nengka
enggu makapayag su kabarakat'engka.
9 Pidtaluan nengka bu su Maliga a Lagat sa 'gkamala, na migkamala;
pinangunanan nengka silan lemipag kanu entu a mana silan 'bpelakaw kanu damapedtad.
10 Na kanu maitu ba a ukit, na nakalipuas'engka silan kanu lima nu 'gkangabensi kanilan;
inilipuas'engka silan kanu kapegkagaga nu manga kuntela nilan.
11 Na su manga kuntela nilan na natangguban nu ig'a lagat,
apia sakataw na dala nasama kanilan.
12 Na tembu naginugut su manga taw nengka kanu manga pasad'engka,
midsengal silan sa pugi sa leka.
13 Ugaid'a nangagan nilan bun nalipatanan su entu a manga pinggula nu Kadenan a Mapulu;
da nilan angapi su manga kahanda nin a dait a enggulan nilan.
14 Na lu kanu tawan-tawan a dalepa na binatalu nilan sekanin
sabap sa nia nilan a benal pegkiugan pegkan na su nalayaman nilan a pegken.
15 Tembu inenggay nin kanilan su ngin i 'bpangenin nilan
ugaid'a pinapaitan nin bun silan sa sangat i kapasang'in a sakit.
16 Na lu kanu pegkampuan nilan na pinangalikudan nilan su Musa
enggu su Harun a suti a 'bpangurban kanu Kadenan a Mapulu.
17 Na sabap sa entu na naguka su lupa, na linamed'u lupa si Datan
enggu nakalebeng si Abiram apeg'u manga kaped'in.
18 Na natutung'u 'bpangalaw-kalaw a apuy su manga tagapeda nilan;
natutung'u kaleg'u apuy su manga dupang a taw.
19 Na lu sa dalepa a Hurib na minumbal silan sa bulawan a sapi
ka sinimba nilan su entu a inumbal'ilan a pegkakadenanen.
20 Inidsambi nilan su Kadenan a da idsan nin i kabarakat'in
sa kanu inumbal'ilan a pegkakadenanen a mana buntal'a sapi a pegkan bu sa utan.
21 Linipatanan nilan su Kadenan a 'bpamelipuas kanilan
a minggula sa manga kagaipan kanu dalepa a Egypt
22 a su kalupan nu manga tupu nu Ham
enggu lu kanu Maliga a Lagat.
23 Kagina ka maitu na pidtalu nu Kadenan i binasan nin silan.
Ugaid'a su Musa a pinamili nin
na namagelet kanu Kadenan enggu kanu manga taw a namedsungkang,
pinangeni nin kanu Kadenan i iawa nin pan su lipunget'in ka enggu di nin silan binasan.
24 Na inikias'ilan su mapia a kalupan
ka da salig'ilan kanu pasad'u Kadenan.
25 Namembuku silan lu kanu balung-balung a tuleda nilan
taman sa da nilan paginuguti su Kadenan a Mapulu.
26 Tembu su Kadenan na inibpasad'in kanilan
i imatayan nin silan lu kanu tawan-tawan a dalepa
27 enggu pabpalak-palaken nin su manga tupu nilan kanu manga ped a bangsa,
itagayak'in silan kanu manga ped a dalepa.
28 Na su manga katupuan tanu na minamung semimba kanu pegkakadenanen a si Baal sa kanu dalepa a Piur
enggu kineman silan kanu iniapal kanu dala uyag-uyag'in a manga pegkakadenanen.
29 Pinakalipunget'ilan su Kadenan a Mapulu sabap kanu kinanggula nilan sa mawag
tembu napatingguma sekanin sa tiuba lu kanilan.
30 Daka su Pinihas na midtindeg ka namagelet
tembu nakatelen su tiuba.
31 Na sabap kanu pinggula a entu ni Pinihas na initimbang sekanin sa matidtu
iganat kanu entu a timpu taman sa taman.
32 Na lu kanu bualan sa Miriba na pinakalipunget'ilan su Kadenan a Mapulu;
na sabap sa entu a pinggula nilan, na mapasang i natala nu Musa a kasiksan.
33 Sabap sa sinakit'ilan su ginawa nu Musa
na nakadtalu sekanin sa manga kadtalu a kababalan.
34 Na da nilan binasa su manga taw lu;a
dala nilan unuti su inisugu nu Kadenan a Mapulu kanilan
35 ka nia pan mula na sinemimbul silan kanu manga bangsa
enggu pinaganadan nilan munut su galebek'ilan a mawag.
36 Sinimba nilan su manga pegkakadenanen nu manga taw a entu
a nabaluy a padulat kanilan.
37 Iniapal'ilan su manga wata nilan a mama
enggu su manga wata nilan a babay kanu manga saitan.
38 Pinaigis'ilan su lugu nu dala kadupangan nin,
su lugu nu manga wata nilan a mama enggu su manga wata nilan a babay.
Iniapal'ilan kanu manga pegkakadenanen sa Kanaan,
na sabap sa entu na su kalupan na naledsikan na lugu.
39 Nanggiabuan silan sabap kanu mawag a pinggula nilan,
na sabap sa entu a pinggula nilan na nakailing silan kanu manga babay a migkiuga.b
40 Na sangat a nalipunget su Kadenan a Mapulu kanu manga taw nin,
nasik a benal i atay nin kanu manga taw a entu a mana nin pusaka.
41 Na inipalad'in silan kanu manga bangsa
ka enggu silan 'gkandatuan nu entain i 'gkabensi kanilan.
42 Na su manga kuntela nilan na 'bpagumis kanilan
enggu nasakup'ilan silan.
43 Madakel den i kinalipuas'u Kadenan a Mapulu kanilan
ugaid'a pedtibaban nilan bun i kapedsungkang'ilan sa lekanin,
nia mauli lun na nabinasa silan nu kabaladusan nilan.
44 Ugaid'a apia ka maitu na 'gkalat bun i nanam'u Kadenan kanilan
amaika pedtawag den silan sa lekanin.
45 Na sabap kanilan na nagkalendem'in su kapasadan nin,
na sabap kanu 'bpamelapay a sangat a kakalimu nin na tinelenan nin su kapedsiksa nin kanilan.
46 Pigkahanda nin i latan silan sa nanam'u langun nu nakasigkem kanilan.
47 Hu Kadenan a Mapulu a Kadenan nami, ilipuas kami nengka pan,
limud kami ebpun kanu manga bangsa
ka enggu kami makadsukul-sukul kanu suti a ingala nengka
enggu makanggalaw-galaw kami sa kapugi sa leka.
48 Pugin su Kadenan a Mapulu a Kadenan nu manga taw a Israil
taman sa taman.
Dait a edtalu su langun nu taw sa “Amin.”
Pugin su Kadenan a Mapulu!