Su Kapianan nu Kadenan kanu manga Taw a Israil
105
Edsukul-sukulan tanu su Kadenan a Mapulu, pugin su ingala nin.Ipayag kanu manga bangsa su manga pinggula nin.
2 Edsengalan tanu sekanin, edsengal tanu sa pugi sa lekanin.
Ipayag su langun nu manga kagaipan a pinggula nin.
3 Idsela-sela tanu su suti a ingala nin;
edsisigalaw su langun nu 'bpangadap sa lekanin a Kadenan a Mapulu.
4 Pangilay nu su Kadenan a Mapulu enggu salig kanu kanu kapegkagaga nin,
papanalus'u su kabpangadap'u sa lekanin.
5-6 Hu sekanu a tupu nu Ibrahim a panunugun nu Kadenan a manga tupu nu Yakub a manga pinamili nu Kadenan!
'Gkalendem'u su manga tanda a kagaipan a pinggula nin enggu su kukuman nin.
7 Sekanin su Kadenan a Mapulu a Kadenan tanu,
sekanin i 'bpangukum kanu dunia.
8 Di nin man kalipatanan su kapasadan nin taman sa taman
a mana su inibpasad'in kanu manga temundug pan a manga muliataw
9 a su kapasadan a inumbal'in kanu Ibrahim
a inibpasad'in bun kanu Iskak.
10 Tinalanged'in su kapasadan nin a nia kanu Yakub enggu mapalalayun kanu manga taw a Israila taman sa taman
11 sa nia nin kadtalu na “Inggay ku sa leka su kalupan a Kanaan
a ipebpusaka ku sa leka taman den kanu manga tupu nengka.”
12 Na kanu entu a timpu na paidu pan su manga taw a Israil
enggu lapu pamun silan kanu dalepa a Kanaan.
13 'Bpagalat-alat pamun silan kanu manga bangsa enggu kanu manga pendatuan.
14 Ugaid'a da suguti nu Kadenan sa maumis silan nu apia entain.
Na sabap kanilan na pidtaluan nin su manga datu
15 sa nia nin kadtalu na “Di nu mamungkaidani su manga taw a pinamili ku
enggu su manga nabi a sinugu ku.”
16 Napatingguma sekanin sa kanggutem kanu kalupan nu Kanaan,
bininasa nin su langun nu kauyagan.
17 Ugaid'a napauna su Kadenan sa taw nin lu sa Egypt,b
na su entu a taw na su Yusup a pibpasa asal'a mapangungulipen.
18 Naupisan su ay nin sa kinasangkali lun
enggu sinangkalian bun i lig'in sa putaw
19 taman kanu timpu a natuman su manga naalung'in.c
Na inipaamad'u Kadenan i benal su entu.
20 Pinaliu sekanin nu datu kanu bilangguan;
su 'gkaunutan nu manga bangsa i napambaya-baya sa lekanin.
21 Binaluy nu datu sekanin a 'gkakataw kanu tulugan nin
enggu 'gkakataw kanu langun nu kaaden nin.
22 Sinugutan sekanin sa kagkiug-kiugan nin mamapata su 'gkangasaligan nu datu
enggu mamandu kanu 'bpangingindawan kanu datu.
23 Ulian nu entu, na su Yakub na linemu den sa Egypt
ka mindilapu sekanin kanu kalupan nu tupu nu Ham.d
24 Na pinambuad-buad'u Kadenan a Mapulu su manga taw nin.
Pinagkabagel'in kumin kanu manga kuntela nilan.
25 Pigkahanda nu Kadenan i kabensian nu manga taw a Egypt su manga taw nin a Israil
enggu pagakalan silan a manga panunugun nin.
26 Na sinugu nu Kadenan a Mapulu su Musa a panunugun nin
enggu su Harun a pinamili nin.
27 Inipailay nilan kanu manga taw a Egypt su manga tanda a kagaipan;
napailay silan sa kangagaipan kanu kalupan nu Ham.
28 Pinagkalibuteng'u Kadenan a Mapulu su kalupan nu Egypt taman sa nangilem-kilem i kalibuteng'in kanu kalupan
ugaid'a sinungkang'ilan bun su manga kadtalu nin.
29 Binaluy nin a lugu su langun nu lawas'u ig
a sabapan na kinapamamatay nu manga seda.
30 Pinenu nin sa manga bakalat su lusud'u Egypt
taman sa nameludep kanu manga tulugan nu 'gkangaunutan nilan.
31 Inisugu nu Kadenan i katingguma nu makapal a langaw
enggu manga kasuk kanu lusud'u inged'ilan.
32 Pinaulan nin sa ilu
enggu namedtalas su kilat kanu kalupan.
33 Nabinasa su manga pamumulanen a ubas enggu su manga kayu a igus
taman den kanu manga palakayu-kayuan.
34 Inisugu nin i katingguma nu manga tapudi
a su tambukakaw a di magaga milang i kadakel'in.
35 Kinan nilan su langun nu gadung a pamumulanen kanu kalupan nilan
enggu bininasa nilan su manga unga nu pamumulanen kanu kalupan.
36 Inimatayan nu Kadenan su langun nu kaka sa langun a wata a mama nu manga taw a Egypt
a su muna-muna a unga nu bilawatawan nilan.
37 Entu pan ka pinaliu nu Kadenan a Mapulu su manga taw nin kanu dalepa a Egypt
a namakapananggit sa manga pilak enggu bulawan
taman sa apia sakataw na dala demun nagkaidan kanilan.
38 Napia pan i ginawa nu manga taw a Egypt kanu kinaawa nilan
sabap sa inikagilek'ilan a benal su manga taw a Israil.
39 Na kanu kabpelalag'ilan na pinapagatag-atag'u Kadenan kanilan su gabun ka enggu silan kasilungan,
na kanu magabi menem na nangaden su Kadenan sa apuy a makatayaw kanilan.
40 Nangeni silan kanu Kadenan sa makan
na inenggan nin silan sa pugu enggu pinakausugan nin silan kanu pegken a bedtuan sa manna a ebpun sa sulega.
41 Inupak'in su masela a watu, daka tinemuga su ig
a mana den lawas'a ig kanu mamala a lupa.
42 Ka da man kalipatani nu Kadenan a Mapulu su suti a kapasadan nin
kanu Ibrahim a panunugun nin.
43 Pinaliu nin kanu dalepa a Egypt su manga taw nin a pinamili nin a sangat a 'gkangagalaw
enggu pakalalis silan sa kapia na ginawa.
44 Inenggay nin kanu manga taw nin su manga kalupan nu ped a manga bangsa,
napagagani nilan su dikena nilan nalugatan.
45 Na pinggula nu Kadenan su langun nu entu ka enggu nilan makanggulalan su manga pangitaban nin a inenggay nin kanilan.
Pugin su Kadenan a Mapulu!