Su Kadenan a 'Bpangaden kanu Langun-langun
104
Na nia 'gkadtalu nu ginawa ku na pugin ku su Kadenan a Mapulu.Hu Kadenan a Mapulu a Kadenan ku na sangat man i kabagel'engka!
Nakalambung sa leka su kabadtugan enggu su kabarakatan.
2 Nakabaus sa leka su maliwanag a mana nakambalegkas sa leka.
Inibetad'engka su langit sa mana tuleda,
3 lu nengka ba pinatindeg su pila-pangkat a walay nengka kanu ig sa kawang-kawangan.
Inumbal'engka a mana kalisa su manga gabun,
'bpageda ka kanu manga papak'u sambel.
4 Su sambel i inumbal'engka a papedsabpeta kanu kadtalu nengka,
su manga kilat i manga panunugun nengka.
5 Pinatindeg'engka su dunia sa mabagel i manga udsadan nin
ka enggu di magkeleng-keleng.
6 Tinangguban nengka su entu sa madalem a ig a mana ginis a nakatanggub lun,
na su manga ig na nakalampas pan kanu manga palaw.
7 Na kanu kinasapal'engka bu na nakaawa mamagayas su manga ig,a
na kanu katanug'u lugung'engka bu na namakatapuyak su entu.
8 Tembu su manga ig na tinemuga kanu kapalawan enggu kanu manga kadatalan
taman kanu dalepa a inadil'engka a kambetadan nilan.
9 Na binetadan nengka su entu sa endulunan asal'a di silan makalampas
ka enggu di nilan katangguban 'bpaluman su dunia.
10 Na napatuga ka sa manga bualan lu kanu manga lepak,
pedtuga silan kanu pageletan nu manga bakulud
11 a pakaenggay sa ig a mainem'u manga talaw a binatang;
na su manga talaw a kimar na naawa su kapegkamala nilan.
12 Na sia kanu ligid'u manga lawas'a ig na pedsalag su manga papanuk sa kawang-kawangan
a 'bpamedsengal lu kanu manga sapak'u manga kayu.
13 Na ebpun kanu langit a pegkalebenan nengka na binubuan nengka sa ulan su manga palaw,
na sangat a 'gkasukul su dunia kanu unga nu manga pinggula nengka.
14 Pebpagetun nengka su manga utan a kapanadtaban nu manga sapi,
pebpagetun nengka su manga pamumulan a masabpet'u manga taw
asal'a aden makan nilan ebpun kanu lupa.
15 Na su manga ig'a ubas a binaluy a alak na mainem'ilan a makagkagalaw kanu ginawa nilan,
su manga lana na makapagkatilak kanu beneng'ilan
enggu su pegken na makapagkabagel kanilan.
16 Hu Kadenan a Mapulu, su manga kayu nengka na 'gkabubuan sa mapia
a su manga kayu a sidar a inipamula nengka kanu dalepa a Libanun.
17 Na lu ba pedsalag su manga papanuk;
na su manga papanuk menem a beguk na lu pedsalag kanu manga kayu a sipris.
18 Na lu menem kanu manga malambeg a palaw na lu ba su manga talaw a manga kambing;
na lu menem kanu manga lakungan na pedtatalaguy su manga badyir.b
19 Inaden nengka su ulan-ulan a tanda kanu manga timpu;
su senang na katawan nin i kutika nu kasedep'in.
20 Inaden nengka su malibuteng, na entu ba su magabi,
na langun na manga binatang sa damakayu na 'bpelibet 'bpelalakaw sa kabpangilay sa makan.
21 Na su manganguda a alimaw na pedtagaw sa kabpangilay nilan sa makan,
'bpangilay silan sa makan a makabpun sa leka a Kadenan.
22 Na amaika pedsebang den su senang
na embalingan den silan kanu manga lingkab'ilan ka mangintelenen silan.
23 Na su manga taw menem na 'bpameliu ka 'bpelu silan kanu penggalebekan nilan,
na penggalebek silan taman sa edsukilep.
24 Hu Kadenan a Mapulu, madakel a benal su pinangaden nengka!
Inaden nengka su langun sia luyud kanu ilemu nengka;
su dunia na napenu na balangiawa a pinangaden nengka.
25 Su lagat na sangat i kaulad'in,
na su manga malanap-lanap kanu entu na di mabilang i kadakel'in
magidsan i manaut-matiwalu a aden uyag-uyag'in.
26 Su manga kapal na pendadalayag kanu entu,
na lu bun ba pendadalanguy su inaden nengka a bedtuan sa Libiatan.c
27 Na su langun nu entu ba na 'bpangingapa sa leka
sa kaenggay nengka kanilan sa makan sia kanu timpu a nasisita nilan;
28 na su ibpangenggay nengka kanilan a pegken na 'bpamelimuden nilan;
ibpangenggay nengka u ngin i nasisita nilan, na sangat a pakausug kanilan su entu.
29 Na amaika pedtaligkudan nengka silan, na pegkukuken silan na gilek;
na amaika tebpeden nengka su napas'ilan, na matay den silan
taman sa makambalingan den silan kanu libubuk.
30 Na amaika 'bpagenggan nengka menem silan sa napasd na 'gkapangaden silan;
na amaika maitu na 'gkapangaden menem su bagu a pinangaden kanu liwawaw nu dunia.
31 Hu Kadenan a Mapulu, pangeni-ngenin ku i su sigay nengka na taman sa taman
enggu magalaw ka kanu manga pinangaden nengka.
32 Na amaika pedtulikan nengka su dunia na 'gkakuyung;
amaika 'bpagamin nengka menem su manga palaw na pedtagebel.
33 Na edsengalan ku su Kadenan a Mapulu taman sa bibiag aku pan;
edsengal aku sa pugi sa lekanin taman a aden pan napas ku.
34 Na pangeni-ngenin ku i sia kanu kabpamikil ku pantag sa lekanin na makasuat i entu sa lekanin
ka pakadsisigalaw aku man kanu Kadenan a Mapulu.
35 Na isugut'engka den a madala kanu liwawaw nu dunia su manga baladusa
enggu maawa den taman sa taman su dupang a manga taw.
Pugin ku su Kadenan a Mapulu.
Pugin su Kadenan a Mapulu!