Su Kadsukul-sukul sabap kanu Kapianan nu Kadenan
Sengal'u Daud.
103
Na nia 'gkadtalu nu ginawa ku na pugin ku su Kadenan a Mapulu,pugin ku su suti a ingala nin sa senep sa atay ku.
2 Pugin ku su Kadenan a Mapulu,
di ku lipatanan su langun na kapianan a pinggula nin sa laki.
3 Inampun nin su langun nu kabaladusan ku
enggu pinagkapia nin su langun nu penggedamen ku.
4 Inilipuas aku nin kanu nanget a kapatay,
pinalihalan aku nin kanu sangat a kakalimu nin enggu kanu lat a nanam'in.
5 Inenggay nin sa laki su ngin i mapia taman sa bibiag aku pan.
Tembu mimbalingan su kabagel ku kanu timpu na kanguda ku pan a mana papanuk a lumalagit.
6 Su Kadenan a Mapulu na bantang i kukuman nin;
ibpagenggay nin i kawagib'u manga taw a 'gkangaumis.
7 Inipayag'in paganay kanu Musa su manga ukit'in;
inipailay nin bun kanu manga taw a Israil su manga pinggula nin a kangagaipan.
8 Su Kadenan a Mapulu na malimu enggu aden lat a nanam'in kanu manga taw,
dikena sekanin malemu malipunget enggu su sangat a kakalimu nin na di embagu.
9 Dikena tatap i kapendaway nin sa lekitanu
enggu dikena lalayun i kakalipunget'in.
10 Da tanu nin siksa sia luyud kanu ngin i kabaladusan tanu.
Da tanu nin papamayada sia luyud kanu ngin i kadupangan tanu.
11 Na u ngin i kasela nu pageletan nu langit enggu lupa
na maitu bun ba i kasela na limu nin kanu manga taw a magilek sa lekanin.
12 Na u ngin i katangka nu sebangan kanu sedepan
na maitu bun ba i kapedtangka nin sa lekitanu kanu manga kabaladusan tanu.
13 Mana bun su ama a masela i lat a nanam'in kanu manga wata nin
na maitu bun ba su Kadenan a Mapulu kanu apia entain a magilek sa lekanin.
14 Ka katawan nin man u ngin i kalubayan tanu;
katawan nin bun i pinangaden tanu bu ebpun sa libubuk.
15 Su uyag-uyag'u manusia na mana manga utan;
mana su manga ulak kanu maliwanag a 'gkailay su kapia na palas'in sa mangagan bu
16 ka u semanggiup den su sambel kanu entu na 'gkadala den
taman sa napenas den kanu nabpunan nin.
17 Ugaid'a su sangat a kakalimu nu Kadenan a Mapulu
kanu manga taw a magilek sa lekanin na taman sa taman.
Su katidtu nin na taman pan kanu manga wata nu manga wata nilan
18 a su entain bu i enggulalan kanu kapasadan nu Kadenan
enggu maginugut sa mapia kanu manga kasuguan nin.
19 Na pinatindeg'u Kadenan a Mapulu su kulesi nin kanu sulega,
su pendatuan nin na 'gkasakup'in su langun-langun.
20 Pugi nu su Kadenan a Mapulu, su sekanu a nan a manga malaikat'in a barakat
a 'bpakikineg sa lekanin enggu 'bpaginugut kanu kadtalu nin.
21 Na su langun nu sekanu
a barakat sa sulega a penggula kanu kahanda nin na pugi nu su Kadenan a Mapulu.
22 Na su langun nu pinangaden nin a sia kanu apia endaw kanu pendatuan nin
na mugi kanu Kadenan a Mapulu.
Na nia 'gkadtalu nu ginawa ku na pugin ku su Kadenan a Mapulu.