Su Kapangeni-ngeni sa Tabang lu kanu dala Kapegkapupus'in a Datu
Su kapangeni-ngeni nu taw a 'gkalasay, dala den bagel'in a papegkalimu-limu sia kanu adapan nu Kadenan a Mapulu.
102
Hu Kadenan a Mapulu, pakikineg ka su pangeni-ngeni ku.Pakikineg ka su kabpaguguliang ku 'bpangeni sa leka sa tabang.
2 Di aku pedtaligkudani
sa kanu timpu a kapedtala ku sa kamalasayan.
Pakikineg aku pan
enggu sawal ka sa mangagan su pangeni-ngeni ku.
3 Ka su uyag-uyag ku na 'gkapupus den a mana su bel a 'gkadadag.
Su badan ku na mana den 'gkatutung'a pegkalaw-kalaw a apuy.
4 Mana aku den utan a 'gkagangu.
Da den nanam ku pegkan.
5 Sabap kanu kabpaguguliang ku 'bpangeni sa tabang
na su lanitan ku na dinemeket den kanu suag ku.
6 Mana aku den papanuk a maila kanu tawan-tawan a dalepa,
mana aku den papanuk a bengit kanu dalepa a nageba den.
7 Di aku pakatulug,
mana aku papanuk a da kaped'in kanu untul'u atep.
8 Kagagabian na 'bpagumpaken aku bu nu manga kuntela ku.
Pedsudian aku nilan enggu 'bpagusalen nilan su ngala ku sa kapedsinta.
9 Na nia ku den pegken na aw
enggu pakadsimbul den nu 'bpaginumen ku su lu nu mata ku
10 sabap kanu sangat a kapegkalipunget'engka sa laki.
Na sinapuat aku nengka man ka inidtug aku nengka.
11 Su uyag-uyag ku na 'gkadadag a mana su alung-alung sa magabi a 'gkatekaw demun 'gkalangiap.
Mana aku den utan a 'gkagangu.
12 Ugaid'a seka, Hu Kadenan a Mapulu, na pendatu ka man taman sa taman.
Su ingala nengka na di kalipatanan taman den kanu mamakatundug pan a manga muliataw.
13 Lati ka den sa nanam su Zion
ka nauma den su timpu a inadil'engka,
na ipagedam'engka lun den su limu nengka.
14 Ka sangat man a 'bpakinugunan pamun nu manga panunugun nengka su uman i watu nu siudad a Zion.a
'Bpakinugunan nilan pamun apia nalupet-lupet den.
15 Hu Kadenan a Mapulu, ikagilek ka man enggu pagadatan ka nu manga bangsa.
Na su langun nu datu sa dunia na magadat kanu kabarakat'engka.
16 Kagina patindegen nengka 'bpaluman su Zion
enggu ipailay nengka lu ba su sigay nengka.
17 Sawalen nengka su pangeni-ngeni nu manga miskinan.
Di nengka ikias su manga pangeni-ngeni nilan.
18 Isugut'engka a makasulat su nia ka enggu su mamakatundug pan a muliataw
a da pan mambata na makapugi sa leka a Kadenan a Mapulu.
19 Na su Kadenan a Mapulu a lu sa sulega
na pedtulungan nin su dunia
20 ka enggu nin mapakikineg su kabpangeni sa tabang'u manga nabilanggu
enggu makapalipuas'in su manga taw a sinugat sa kawagib sa kapatay.
21 Na sabap sa entu na makapayag su ingala nu Kadenan a Mapulu lu kanu Zion.b
Pugin sekanin nu manga taw lu sa Awrusalim
22 amaika endidilimudan den su manga taw a ebpun kanu ped a manga bangsa enggu pendatuan
ka semimba kanu Kadenan a Mapulu.
23 Ugaid'a su Kadenan a Mapulu na pinagkalubay nin su badan ku
enggu pinagkababa nin su umul ku.
24 Tembu nia ku nadtalu na “Hu Kadenan ku,
di ka pan pegkua su umul ku
sa timpu a manguda aku pamun.
Seka na dala man kapegkapupus'engka.
25 Sia kanu punan-punan na seka demun i linemimbag kanu langit
enggu lupa.
26 Na mapupus bun su langun nu entu
ugaid'a mana i seka na dala kapegkapupus'engka taman sa taman.
'Gkalabing bun su langun nu entu a mana balegkas.
Na sambian nengka su langun nu entu sa mana bun su kapedsambi kanu balegkas a da den katagan nin.
27 Ugaid'a seka na dili embagu,
su uyag-uyag'engka na dala kapegkapupus'in.
28 Na su manga wata nu manga panunugun nengka na maguyag-uyag sa malilintad,
tiakapan nengka su manga muliataw nilan sia kanu kaadapan nengka.”