Su Kapugi kanu Kadenan a Mapulu sabap kanu Kasuti nin
99
Su Kadenan a Mapulu na sekanin su datu sa langun, tembu dait a kemegkel'a gilek su langun nu bangsa sa dunia!'Bpagagayan sekanin kanu kulesi nin a lu kanu pageletan nu aden papak'in a malaikat tembu dait a makuyung su dunia!
2 Su Kadenan a Mapulu i badtug lu kanu Zion;
sekanin i pendatu kanu langun nu bangsa.
3 Pugin nilan su ingala nin a sangat i kabagel'in enggu kabarakat'in.
Suti man sekanin!
4 Sekanin su Barakat a Datu, 'gkasuatan nin su ngin i wagib,
matidtu su kapangukum'in.
Matidtu enggu wagib su pinggula nin kanu manga tupu nu Yakub.
5 Pugin su Kadenan a Mapulu a Kadenan tanu;
simban tanu sekanin kanu kaadapan nu kulesi nin.
Suti man sekanin!
6 Su Musa enggu su Harun na isa kanu 'bpamangurban lun,
su Samuil na isa bun kanu nangadap sa lekanin.
Tinemawag silan mangeni sa tabang kanu Kadenan a Mapulu na sinawal'in mambu silan.
7 Na lu kanu mana palaus a gabun na inimbitiala nin silan;
pinaginugutan nilan mambu su manga atulan nin
enggu su manga kasuguan nin a inenggay nin kanilan.
8 Hu Kadenan a Mapulu a Kadenan nami, na sinawal'engka man silan.
Inipailay nengka kanilan i seka su Kadenan a minampun kanilan
apia nia nin kaaden i siniksa nengka bun silan kanu manga mawag a pinggula nilan.
9 Pugin su Kadenan a Mapulu a Kadenan tanu,
simban tanu sekanin kanu suti a palawa nin
kagina su Kadenan a Mapulu a Kadenan tanu na suti.