Su Kapugi kanu Kadenan a 'Bpangukum kanu Dunia
Su Sengal.
98
Edsengalan tanu su Kadenan a Mapulu sa bagu a sengalkagina minggula sekanin sa kangagaipan.
Sia kanu kabarakat'in enggu kanu suti a kapegkagaga nin na tinabanan nin su manga kuntela nin.
2 Su Kadenan a Mapulu na inipailay nin kanu dunia su kinataban nin kanu manga kuntela nin;
inipayag'in kanu manga bangsa su katidtu nin.
3 Di nin 'bpelipatanan su sangat a kakalimu nin enggu su katidtu nin
kanu manga taw a Israil.
Na nailay nu langun na taw
su kinalipuas'u Kadenan kanu manga taw kanu lusud'u dunia.
4 Su sekanu a manga taw sa lusud'a dunia, edsengal kanu sa matanug sa aden kagalaw nin kanu Kadenan a Mapulu;
edsengal kanu sa aden kagalaw nin sa kapugi sa lekanin.
5 Edsengal kanu sa pugi kanu Kadenan a Mapulu sa aden palabuni-bunian nin a kutiapi
a makalilini i legku nin a sengal.
6 Edsengal kanu sa matanug sa aden kagalaw nin kanu adapan nu Kadenan a Mapulu a Datu tanu
sa aden palabuni-bunian nin a manga tambuli enggu ped pan a palabuni-bunian a sidung'u manga binatang.
7 Su lagat enggu su langun nu namakadalem lun na mugi sa lekanin;
maitu bun su manga taw kanu dunia na edsengal sa pugi sa lekanin.
8 Edtataupay su manga lawas'u ig
enggu edsasalengan edsengal su manga bakulud sa aden kagalaw nin
9 sia kanu adapan nu Kadenan a Mapulu kagina makatingguma sekanin ka kukumen nin su dunia.
Kukumen nin sa wagib su dunia
enggu kukumen nin su manga bangsa sia luyud kanu ngin i tidtu.