Su Kabarakat'u Kadenan i Kemamal
97
Su Kadenan a Mapulu i Datu! Na edsisigalaw su dunia!Maitu bun su manga dedsan na edsisigalaw bun!
2 Nakalibet sa lekanin su sangat i kalibuteng'in a manga gabun.
Su katidtu enggu su kawagib i udsadan nu kulesi nin.
3 'Bpangunanan sa lekanin su apuy
enggu 'gkatutung'u entu su manga kuntela nin a nakabalibet sa lekanin.
4 Su manga kilat'in i pakagkaliwanag kanu dunia;
na nailay nu dunia su entu taman sa pegkegkel'a gilek.
5 Su manga palaw na mana lansuk a 'gkatunag sia kanu adapan nin a Kadenan a Mapulu
a pendatu kanu lusud'u dunia.
6 Na ipebpayag'u langit su katidtu nin,
'gkailay nu langun nu bangsa su sigay nin.
7 Na su langun nu pedsimba sa pegkakadenanen na makayaya
apeg'u 'bpemamasela kanu dala a nia katagan nin a pegkakadenanen;
langun nu nadtalu a kadenan na makasugiud sa lekanin a Kadenan a Mapulu.
8 Na nangagalaw su manga taw sa Ziona sa kinakineg'ilan sa entu
enggu nangagalaw su manga taw kanu manga dalepa nu Yahuda
sabap kanu kukuman nengka, Hu Kadenan a Mapulu.
9 Ka seka man, Hu Kadenan a Mapulu, i mapulu sa langun kanu langun nu taw sa dunia;
seka i mapulu kanu langun nu nadtalu pan a kadenan.
10 Su Kadenan a Mapulu na ikalimu nin su apia entain a di malilini kanu kadaluakan a galebek,
tiakapan nin su uyag-uyag'u manga taw nin a matidtu;
ilipuas'in silan kanu manga taw a dupang.
11 Katayawan nu sigay nin su manga taw a matidtu.
Na pakagkagalaw su entu kanu manga taw a ikelas i pamusungan nin.
12 Na sekanu a manga taw a matidtu na enggalaw-galaw kanu sia kanu Kadenan a Mapulu!
Edsukul-sukuli nu suti a ingala nin!