Pugin su Kadenan a Mapulu sa Langun a 'Bpangukum
96
Edsengalan tanu su Kadenan a Mapulu sa bagu a sengal;sekanu a manga taw kanu lusud'u dunia, na edsengalan tanu su Kadenan a Mapulu.
2 Edsengalan tanu su Kadenan a Mapulu, pugin tanu su ingala nin;
uman-uman gay na ipayag tanu su kabpamelipuas'in.
3 Ipayag su kabadtugan nin kanu manga bangsa;
ipayag tanu kanu langun nu taw su makagaip a pinggula nin.
4 Ka su Kadenan a Mapulu na barakat enggu dait a pebpugin;
dait man a sekanin bu i pagadatan sa kanu langun na nadtalu pan a kadenan.
5 Kagina su langun man a nadtalu a kadenan nu manga taw na pegkakadenanen bu
ka su Kadenan man a Mapulu i minaden kanu langit.
6 Lu sa lekanin su kabadtugan enggu su kabarakatan;
lu kanu suti a 'bpangadapan sa lekanin su kabagel enggu su tidtu a kapia na palas.
7 Hu sekanu a manga taw kanu uman i bangsa kanu liwawaw nu dunia, pugi nu su Kadenan a Mapulu;
pugi nu su Kadenan a Mapulu sia kanu kabarakat'in enggu kabagel'in.
8 Pugi nu su Kadenan a Mapulu sa kanu manga pugi a nakadait kanu ingala nin,
pamananggit kanu sa ipegkurban ka ludep kanu kanu lama-lama nu suti a 'bpangadapan sa lekanin.
9 Simba nu su Kadenan a Mapulu sia kanu adapan nin a pedsigay na kasuti nin.
Na su langun na taw kanu dunia na dait a kemegkel'a gilek sa lekanin.
10 Edtalu nu kanu manga bangsa i “Su Kadenan a Mapulu i pendatu!
Mabagel su kinapatindeg'in kanu dunia enggu di i nia magkeleng-keleng.
Kukumen nin su manga taw sa wagib.”
11 Su langit enggu su dunia na pakadsisigalaw,
apia su lagat na 'gkakineg su dagus'in enggu su langun nu nakadalem lun na 'bpelalis sa kapebpugi nilan lun.
12 Na su manga malinawag enggu su namakadalem lun na sangat a mangagalaw!
Tembu su laun nu manga kayu lu kanu manga damakayu na pakadsengal silan sa kapia na ginawa
13 kanu adapan nu Kadenan a Mapulu kagina pakatingguma sekanin;
pakatingguma sekanin ka kukumen nin su dunia.
Kukumen nin sa wagib su dunia;
kukumen nin su manga bangsa sia luyud kanu ngin i tidtu.