Su Sengal a Pugi kanu Kadenan
95
Sia kanu, ka edsengalan tanu su Kadenan a Mapulu;edsengalan tanu sa aden kagalaw nin su sekanin a Kadenan a Mapulu a mana masela a watu a kelung tanu enggu 'bpelipuas sa lekitanu!
2 Semupeg tanu kanu kaadapan nin sa aden kadsukul-sukul'in;
edsengalan tanu sekanin sa matanug sa aden kagalaw nin a pugi sa lekanin!
3 Kagina su Kadenan a Mapulu na barakat;
mabagel sekanin a Datu kanu langun nu nadtalu pan a kadenan.
4 Sia kanu palad'in su iganat kanu pila-lapis a lupa
taman kanu mangalambeg a kapalawan.
5 Lekanin bun su lagat ka sekanin i minaden lun,
maitu bun su mamala a kalupan na sekanin bun i linemimbag lun.
6 Sia kanu, ka semimba tanu enggu semugiud tanu sa lekanin a Kadenan a Mapulu;
semugiud tanu kanu kaadapan nin a minaden sa lekitanu!
7 Kagina sekanin su Kadenan tanu
enggu sekitanu menem su manga taw nin a pedtiakapan nin lu kanu panadtaban,
mana tanu bili-bili a pedtuganulen nin.
Saguna, na dait a pakikinegen tanu su suala nu Kadenan
8 sa nia nin kadtalu na “Di nu papegkategas i pamusungan nu a mana su pinggula nu katupuan nu lu sa dalepa a Miriba
enggu lu kanu tawan-tawan a dalepa sa Masa.a
9 Na sangat a binatalu aku nu manga kalukesan nu lu ba
sa apia nailay nilan bun su manga kangagaipan a pinggula ku.
10 Na kanu dalem'u nakapatpulu lagun na sangat a nalipungetan ku silan
taman sa nia ku nadtalu na ‘Silan su manga taw a namakasibay den i pamusungan nin.
Di nilan den 'bpaginugutan su manga kasuguan ku kanilan.’
11 Tembu sabap kanu lipunget ku na inibpasad ku i
‘Di den a benal silan makaludep kanu dalepa a pabpangintelenanb ku kanilan.’ ”