Su Kadenan i 'Bpanuli-suli kanu manga Taw a Matidtu
94
Hu Kadenan a Mapulu, seka su Kadenan a 'bpanuli-suli,itayaw nengka su sigay nengka!
2 Embangun ka, ka seka man su pegkukum kanu dunia;
inggay nengka kanu mangasandag su ngin i dait kanilan!
3 Hu Kadenan a Mapulu, ngin i kauget'a kadsisigalaw nu manga dupang a taw?
Ngin i kauget'a kadsisigalaw nilan?
4 Ngin i kauget'a kangadtalu nilan sa kasandag?
Langun nilan a penggalebek sa mawag na nangapenu silan na kamamasela.
5 Hu Kadenan a Mapulu, pembinasan nilan su manga taw nengka
enggu 'bpagumisen nilan su manga taw a mana nengka pusaka.
6 'Bpangimatayan nilan su manga balu enggu su manga lapu,
'bpamunun nilan su manga ilu
7 sa nia nilan kadtalu na “Su Kadenan a Mapulu na di nin mailay su entu;
su Kadenan nu Yakub na di nin madsagipa su entu.”
8 Sekanu a manga tembang enggu manga babal a taw,
kanu pan guna i kambalaitungan nu?
9 Su sekanin a minaden kanu tangila tanu, na ngintu, di sekanin pakakineg?
Su sekanin a minaden kanu manga mata tanu, na ngintu, di sekanin pakailay?
10 Su sekanin a papedtidtu kanu manga bangsa, na ngintu, di sekanin semiksa?
Su sekanin a 'bpamandu sa ilemu kanu manusia,
na ngintu, dala sabut'in?
11 Su Kadenan a Mapulu, na 'gkatawan nin man su itungan nu manusia;
'gkatawan nin i dala katagan nu langun nu entu.
12 Hu Kadenan a Mapulu, ngin den i kapia nin kanu taw u papedtidtun nengka
enggu 'bpamandun nengka kanu kasuguan nengka.
13 Palilintaden nengka silan sia kanu timpu nu kasimuketan
taman sa di pan mauma su kasiksa kanu manga dupang a taw.
14 Kagina su Kadenan a Mapulu na di nin man padtadayn su manga taw nin,
di nin tagaken su bangsa a mana nin pusaka
15 ka aden gay a makambalingan su wagib a kapangukum.
Na su langun nu taw a ikelas i pamusungan nin na paginugutan nilan su entu.
16 Na entain ba man i maninindeg sa laki sungkang kanu dupang a taw?
Na entain ba man i maninindeg sa laki sungkang kanu penggalebek sa mawag?
17 Na amaika da aku bu man edtabangi nu Kadenan a Mapulu
na su ngiawa ku na lu den basi pendalepa kanu dalepa nu namamatay.
18 Na sia kanu kinadtalu nu ginawa ku sa “Su ay ku na pakadulas den,”
na su sangat a kakalimu nengka, Hu Kadenan a Mapulu
i sinemapipi sa laki.
19 Na amaika madakel i pakasimuket kanu atay ku
na su kabpelimpang'engka na pakapagkagalaw kanu ginawa ku.
20 Ngintu, mapakay ba a temampil sa leka su dupang a 'gkangaunutan
a nia nin pangitaban na pedsugutan nilan su dikena wagib?
21 Na nasaumpung silan sungkang kanu manga matidtu a taw
enggu sinugat'ilan sa kapatay su dala kadupangan nin.
22 Ugaid'a su Kadenan a Mapulu i nabaluy a kuta ku,
sekanin su mana masela a watu a pegkelung sa laki.
23 Na papamayaden nin su manga dupang a taw sa kanu manga kabaladusan nilan
enggu binasan nin silan sabap kanu manga kadupang'ilan.
Su Kadenan a Mapulu a Kadenan tanu i mibped minasa kanilan.