Su Kadsukul-sukul kanu Kadenan
Su Sengal a pedsengalen kanu Gay nu Kabpangintelenen.
92
Ngin den i kapia nin i kadsukul-sukul kanu Kadenan a Mapuluenggu kadsengal sa pugi kanu ingala nin a Kadenan a Mapulu sa Langun.
2 Ngin den i kapia nin i kapayag kanu sangat a kakalimu nin sia kanu timpu nu mapita
enggu su katidtu nin sia kanu timpu nu magabi
3 a pedsalenganen nu uni nu palabuni-bunian a alpa a sapulu i iket'in
enggu su uni nu kutiapi.
4 Hu Kadenan a Mapulu, pinagkagalaw aku nengka kanu manga pinggula nengka;
sabap kanu manga pinggula nengka na pakadsengal aku sa aden kagalaw nin.
5 Hu Kadenan a Mapulu, ngin den i kapia nin su pinggula nengka!
Di matengkad su itungan nengka!
6 Su taw a tembang na di nin katawan su entu;
su taw a babal na di nin kasabutan su entu.
7 Apia man mangengetu pan su dupang a manga taw a mana su manga utan
enggu makapaguyag-uyag sa mapia su mawag a manga taw
na nia nilan bun kabpawangan na su dala kapegkapupus'in a kabinasan.
8 Ugaid'a seka, Hu Kadenan a Mapulu, na lalayun ka makapulu taman sa taman.
9 Hu Kadenan a Mapulu, su manga pegkuntela sa leka
na natalatantu a mamamatay;
su langun nu taw a penggula sa mawag na mamakabpalak.
10 Ugaid'a pinagkabagel aku nengka a mana kabagel'u talaw a tudu a sapi;
sangat a pinagkagalaw aku nengka.
11 Nambamatan nu mata ku su kinaudtang'u manga kuntela ku;
nakineg'u tangila ku su tagaw nu manga kuntela ku.
12 Su ikelas a taw na 'bpaguyag-uyag sa mapia a mana su mapia a kabpaguyag-uyag'u kayu a libi
enggu 'bpangengetu a mana kayu a sidar sa Libanun.a
13 Mana silan manga kayu a inipamula kanu walay a 'bpangadapan kanu Kadenan a Mapulu;
'bpaguyag-uyag silan sa mapia sia kanu manga lama-lama nu suti a 'bpangadapan kanu Kadenan tanu.
14 Na apia mangatua den silan na 'bpamangunga pamun;
lalayun gadung i manga laun nilan enggu mabagel i lawas'ilan.
15 Na pakapailay su entu kanu katidtu nu Kadenan a Mapulu.
Sekanin su mana masela a watu ku. Dala sa lekanin su apia ngin a kawagan!