Su Kadenan i Pedtiakap sa lekitanu
91
Na apia entain i maguyag-uyag sia kanu tiakap'u Kadenan a Mapulu sa Langunna makapangintelenen sa mapia sia kanu kelung'u Barakat sa Langun.
2 Nia nin madtalu kanu Kadenan a Mapulu na “Seka i mabagel a kuta ku a pegkelung sa laki;
seka su Kadenan ku a pedsaligan ku.”
3 Kagina su Kadenan na ilipuas ka nin kanu manga padulat'u manga dupang
enggu kelungan ka nin kanu pakapatay a sakit.
4 Tiakapan ka nin
a mana su kabpelekep'u ina nu manuk kanu pipis'in.
Su katidtu nin i mabaluy a kelung'engka enggu pangalaw nengka.
5 Na di ka kagilekan kanu manga pakagilek a manggula kanu timpu nu magabi
atawa ka kanu manga asad'u busug a 'bpamelayug kanu malamag.
6 Di ka kagilekan kanu manga sakit a makatingguma kanu timpu na malibuteng
atawa ka kabinasan a pakatingguma kanu timpu na malamag.
7 Apia ngibu-ngibuan pan i matay kanu ubay nengka,
apia sapulu ngibu pan i matay kanu embala-bala nengka
na di ka bun kagkaidan.
8 Na ilay ka kanu duambala a mata nengka
u panun i kasiksa kanu manga dupang a taw.
9 Na sabap sa pabpelindung ka kanu Kadenan a Mapulu
a Barakat sa Langun a mana walay a pendalepan nengka
10 na dala makagkaid a makatingguma sa leka;
dala makatingguma a tiuba kanu pegkalebenan nengka.
11 Kagina sugun nin su manga malaikat'in sa katiakap'ilan sa leka sa apia endaw ka 'bpawang.
12 Sapipin ka nilan
asal'a di kagkaidan nu manga watu su manga ay nengka.
13 Dakudaken nengka su manga alimaw enggu su manga nipay;
dakudaken nengka su manga manguda a alimaw enggu su manga bisa a nipay.
14 Nia pidtalu nu Kadenan a Mapulu na “Ilipuas ku su apia entain a malimu sa laki;
kelungan ku su apia entain a semalig kanu ingala ku.
15 Amaika temawag silan sa laki na sawalen ku silan,
tapiden ku silan sa kanu timpu na kasimuketan,
ilipuas ku silan enggu badtugen ku silan.
16 Balasan ku silan sa malendu a kapagumul
enggu ipagedam ku kanilan su kalipuasan ebpun sa laki.”