Ikapat a Libelu
(Sengal 90 —106)
Su Kabagel'u Kadenan enggu su Kalubay nu Manusia
Su pangeni-ngeni nu Nabi Musa.
90
Hu Mapulu, mana ka man dalepa a pendadalepan namiaiganat pan kanu timpu nu manga katupuan nami.
2 Unan pan na kinapangaden kanu manga palaw
atawa ka kinapangaden kanu dunia enggu su langun na nakadalem lun,
na seka den su Kadenan a Kadenan taman sa taman.
3 Seka bun i papembalingan kanu manusia kanu libubuk
sa nia nengka kadtalu na “Sekanu a manga manusia, na embalingan kanu kanu libubuk.”
4 Kagina su sangibu a manga lagun sa lekami
na san sa leka na mana sagay bu a sinemagad
atawa ka mana pila kauras bu kanu magabi.
5 Pedtebpeden nengka su napas'u manusia sa mana taginepen a sakelap bu na nadadag den,
6 mana silan manga utan a pedsalimbagu 'bpagetu kanu mapita
ugaid'a nia nin kapegkagabi na 'gkangalanes den taman sa 'gkangagangu.
7 Ka sabap man kanu lipunget'engka na mana kami nagepul'a apuy;
sabap kanu kapegkalipunget'engka na sangat a nangagilekan kami.
8 Na inalal'engka su kabaladusan nami kanu kaadapan nengka,
na su namakapagena a kabaladusan nami na napayag sa leka langun.
9 Na sabap kanu lipunget'engka na natebped den su manga gay nami;
su manga umul'ami na sakelap bu na mapupus a nangalidu i ginawa nami.
10 Na su kangalendu nu manga umul'ami na pitupulu lagun bu atawa ka walupulu lagun,
amaika mabagel su kanggulawas'ami.
Ugaid'a apia man sia kanu mangapia a timpu a uyag-uyag'ami na pedtala kami bun sa sangat a kapasang enggu kasimuketan.
Su umul'ami na mangagan sa mangagan na madala bun enggu mapupus bun.
11 Entain ba man i makagaga temuntay kanu bagel'u lipunget'engka?
Su lipunget'engka man na sangat a mabagel tembu dait a ikagilek ka.
12 Na patuntayi ka sa lekami i su uyag-uyag'ami na mangagan bu a benal
ka enggu maaden kanu atay nami su kabpaguyag-uyag a aden kabalaitungan nin.
13 Hu Kadenan a Mapulu, ngin pan i kauget'a kalipunget'engka sa lekami?
Lati ka sa nanam su manga panunugun nengka!
14 Ipagedam'engka sa mapia sa lekami su sangat a kakalimu nengka kanu uman mapita
ka enggu kami makadsengal sa aden kagalaw nin sa kanu langun nu manga timpu nami.
15 Na pagkagalaw kami sa mana bun su kalendu nu manga gay a kinapatala nengka sa lekami sa mapasang
enggu mana bun su kalendu nu manga lagun a kinalasay nengka sa lekami.
16 Ipayag'engka kanu manga panunugun nengka su makagaip a penggulan nengka;
ipayag'engka kanu manga wata nami su kapegkagaga nengka.
17 Hu Mapulu a Kadenan nami, palihalai kami pan,
pambantas ka su penggalebeken nu manga lima nami,
pambantas ka su penggalebeken nu manga lima nami!