Su Kapasadan nu Kadenan kanu Daud
Su nia a Sengal a mapia i kinaumbal lun na inisulat'u Itan a tupu ni Zira.
89
Hu Kadenan a Mapulu, edsengalen ku taman sa taman su pantag kanu sangat a kakalimu nengka;su katidtu nengka na ipayag'u ngali ku kanu langun nu temundug pan a muliataw.
2 Kagina nia 'gkadtalu nu ginawa ku na su sangat a kakalimu nengka na di embagu taman sa taman;
su katidtu nengka na mana bun su langit a dala tedtab'in.
3 Nia nengka pidtalu na “Nangaden aku sa kapasadan kanu pinamili ku,
nia ku inibpasad kanu panunugun ku a si Daud
4 na ‘Pandatun ku su tupu nengka taman sa taman,a
su kadatu nengka na di mapupus taman kanu manga temundug pan a muliataw nengka.’ ”
5 Hu Kadenan a Mapulu, pangeni-ngenin ku i pugin nu aden manga uyag-uyag'in sa sulega su manga makagaip a pinggula nengka,
pugin su katidtu nengka sia kanu 'gkangalimud a manga malaikat a suti.b
6 Kagina entain ba man kanu kawang-kawangan i makasulagid sa leka a Kadenan a Mapulu?
Entain ba man kanu aden uyag-uyag'in san sa sulega i makalimbang sa leka a Kadenan a Mapulu?
7 Na sangat man a 'bpagadatan ka nu 'gkangalimud a manga malaikat a suti,
labi i kabagel'engka kanu langun nu entu a namakalibet sa leka.
8 Hu Kadenan a Mapulu a Kadenan a Barakat sa Langun,
entain ba man i makalawan kanu kabagel'engka?
Sangat i katidtu nengka kanu langun nu penggulan nengka.
9 Seka i pendatu kanu lagat a aden mangasela a bagel'in;
na pakapatelen nengka su manga masela a bagel.
10 Linupet-lupet'engka su naga sa lagat a bedtuan sa Rahab,c
initagayak'engka kanu mabagel a limad nengka su manga kuntela nengka.
11 Ka leka man su langit enggu su kalupan;
su dunia enggu su langun nu nakadalem lun na pinangaden nengka.
12 Pinangaden nengka su ilud enggu laya,
su palaw a Tabur enggu palaw a Hirmun na 'gkangagalaw sa kapebpugi nilan kanu ingala nengka.
13 Su lima nengka na sangat i kabarakat'in
enggu sangat i kabagel'in.
14 Su kaikelasan enggu su kawagib i udsadan nu kulesi nengka,
su sangat a kakalimu enggu su katidtu i 'bpangunanan sa leka.
15 Hu Kadenan a Mapulu, mapia den a benal kanu taw a pakalalis sa kapia na ginawa kanu kapedsimba nilan sa leka
enggu sia silan 'bpaguyag-uyag kanu kaliwanagan nengka a pakaenggay kanilan sa kapianan.
16 Na kanu kagagabian na sangat a 'gkangagalaw silan sabap kanu ingala nengka
enggu pebpugin nilan su kaikelasan nengka.
17 Kagina seka i 'gkabpunan nu bagel'ami,
na sia kanu kapianan nengka na 'bpanaban kami.
18 Kagina seka man a Kadenan a Mapulu i minenggay sa makakelung sa lekami,
seka a kaisa-isa nin a Suti a Kadenan nu manga taw a Israil
i namili sa datu a makandatu sa lekami.
19 Kanu paganay na midtalu ka sia nakanggulalan kanu kinapaalung'engka kanu manga matidtu a manga taw nengka, sa nia nengka pidtalu na
“Inenggan ku sa bagel su badtug a pabubunua;
pinamili ku sekanin ebpun kanu manga taw a mabaluy a datu.
20 Na su napamili na si Daud a panunugun ku;
binubusan ku sekanin kanu suti a lanae ku;
21 su bagel ku na mapalalayun sa lekanin;
su kapegkagaga ku i makapagkabagel sa lekanin.
22 Na di sekanin kadulatan nu manga kuntela nin,
di sekanin matalaw nu manga daluaka a taw.
23 Lupet-lupeten ku kanu kasangulan nin su manga kuntela nin;
imatayan ku su 'gkabensi sa lekanin.
24 Na su katidtu ku enggu su sangat a kakalimu ku na mapalalayun sa lekanin,
sia makanggulalan kanu ingala ku na manaban sekanin.
25 Na su kadatu nin na makauma iganat kanu lagat'u Miditiranian
taman kanu lawas'a ig'u Yupratis.
26 Na edtalun nin sa laki i “Seka i Ama ku a Kadenan ku;
seka i mana masela a watu a kalipuasan ku!’
27 Na itimbang ku sekanin a kaka sa langun a wata ku,
sekanin i mapulu sa langun nu datu sia sa dunia.
28 Na su sangat a kakalimu ku sa lekanin na di embagu taman sa taman
enggu su kapasadan ku lun na da kapegkapupus'in.
29 Pandatun ku su tupu nin taman sa taman
enggu su kulesi nin na mana su langit a dala kapegkapupus'in.
30 Ugaid'a amaika sungkangen nu manga tupu nin su kasuguan ku
enggu di silan maguyag-uyag sia luyud kanu manga atulan ku
31 atawa ka sungkangen nilan su pangitaban ku
enggu di nilan paginugutan su kasuguan ku
32 na siksan ku silan sa mapasang.
Na sangat a kapasangan silan sabap kanu kadupangan nilan.
33 Ugaid'a di ku tebpeden su sangat a kakalimu ku kanu Daud
enggu su pasad ku sa lekanin.
34 Di ku sungkangen su kapasadan ku sa lekanin
atawa ka di ku bagun su manga kadtalu ku a linemiu kanu ngali ku.
35 Na kagina ka nakabpasad aku den kanu Daud sia luyud kanu kasuti ku
na di den embagu su entu ka di ku man embudtudan si Daud.
36 Na mapalalayun kanu tupu nin su kadatu taman sa taman;
su kulesi nin na dala kapegkapupus'in sia kanu adapan ku a mana su senang a pedsebang.
37 Di maawa su entu taman sa taman a mana su ulan-ulan
a dala kapedtaman na kapedsaksi nin lu kanu kawang-kawangan.”
38 Ugaid'a saguna na binugaw nengka enggu inikias'engka sekanin;
sangat a 'gkalipungetan nengka su pinamili nengka a datu.
39 Na tinebped'engka su kapasadan nengka kanu panunugun nengka;
na pingguledsikan nengka kanu libubuk su sansangan nu kadatu nin.
40 Bininasa nengka su alad'u siudad'in;
gineba nengka su manga kuta a 'bpamagenan nin
41 tembu su langun na pedsagad kanu siudad'in na 'bpanegkaw lun
enggu pedtakudin nu manga pagubay nin a dalepa.
42 Na pinapanaban nengka su manga kuntela nin
enggu pinagkagalaw nengka silan langun.
43 Na liu pan sa entu, na inawan nengka sa katagan su sundang'in,
da nengka den sekanin tabangi kanu kapembunua nin.
44 Iniawa nengka den su sigay nin
enggu inidtug'engka kanu lupa su kulesi nin.
45 Mangagan nengka gaid sekanin pinagkatua,
inibaus'engka sa lekanin su kayayan.
46 Hu Kadenan a Mapulu, ngin i kauget'a di nengka kapailay sa laki? Ngintu, taman sa taman den su kataligkud'engka?
Ngin i kauget'u lipunget'engka a mana pakatutung a apuy?
47 'Gkakalendem ka i su umul ku sia sa dunia na mangagan bu a benal.
'Gkakalendem ka i pinangaden nengka su manusia sa aden papatayan nin.
48 Entain ba man i taw a 'bpaguyag-uyag a di makaukit sa kapatay?
Entain ba man i taw a makalipuas kanu bagel'u kapatay?
49 Hu Kadenan a Mapulu, endaw den su sangat a kakalimu nengka paganay
a inibpasad'engka kani Daud sia luyud kanu katidtu nengka?
50 Hu Kadenan a Mapulu, di ka 'bpelipatani su kinapagkaya kanu panunugun nengka;
tinigkelan ku su kasakit'u kapapegkaya sa laki nu madakel a taw.
51 'Bpagumpaken nu manga kuntela nengka su pinamili nengka a datu;
'bpagumpaken nilan sa apia endaw sekanin pebpawang.
52 Pugin su Kadenan a Mapulu taman sa taman.
Amin! Amin!