Su Pangeni-ngeni nu Taw a Pedtala sa Kamalasayan
Lu i nia pakatumpa kanu 'gkaunutan nu pasesengal. Sengal'u manga tupu ni Kura. Pedsengalen nilan su nia sia makanggulalan kanu ukit'u kapebpalabuni-bunian a bedtuan sa “Mahalat Lianut.” Su nia a Sengal a mapia i kinaumbal lun na inisulat'i Himan a tupu ni Zira.
88
Hu Kadenan a Mapulu a 'bpelipuas sa laki,na magabi sa malamag kanu kaadapan nengka na pedtawag aku bu sa leka sa tabang.
2 Pakikineg ka su kapangeni-ngeni ku,
pakikineg ka su kabpaguguliang ku pedtawag sa leka 'bpangeni sa tabang.
3 Kagina napenu den a kasimuketan i ginawa ku,
su umul ku na masupeg den sa pakubulan.
4 Mana aku su taw a mangagan den maulug kanu kalut,
mana aku su mama a da den bagel'in.
5 Mana aku minatay a pinadtaday den,
mana aku minatay a nakaiga den kanu pakubulan.
Mana aku su manga taw a linipatanan nengka den
kagina inipitas'engka den kanu tiakap'engka.
6 Mana aku nengka iniulug kanu madalem enggu malibuteng a benal a kalut.
7 Su lipunget'engka na 'gkaugatan aku nin den a benal
a mana bagel'u lagat a pakatanggub sa laki.
8 Na initangka nengka sa laki su manga pakat ku,
binaluy aku nengka a 'gkasikan na atay nilan.
Na naligken aku a di den makaliu.
9 Su kapegkailay nu mata ku na malebug den sabap kanu lidu na ginawa ku.
Hu Kadenan a Mapulu, uman-uman gay na 'bpangeni aku bu sa leka sa tabang;
ipebpulu ku su lima ku sa kabpangeni-ngeni ku sa leka.
10 Ngintu, enggula ka pan besen sa kangagaipan kanu manga namamatay?
Ngintu, embabangun pan ba su namamatay asal'a mugi sa leka?
11 Ngintu, su sangat a kakalimu nengka na mambibitiala pan ba kanu pakubulan?
Atawa ka, su katidtu nengka lu kanu dalepa nu Abadun?a
12 Ngintu, mailay pan ba su kangagaipan a penggulan nengka lu kanu kalibutengan?
Atawa ka, su kalipuasan nengka kanu kalupan a linipatananb den?
13 Ugaid'a saki, Hu Kadenan a Mapulu, na pakapaguguliang aku sa kapedtawag ku sa leka 'bpangeni sa tabang.
Na uman den mapita na 'bpangeni-ngeni aku bu sa leka.
14 Hu Kadenan a Mapulu, ngintu ka ipegkias aku nengka?
Ngintu ka pedtaligkudan aku nengka?
15 Duan-duan ku den ka iganat kanu wata aku pan na pedtala aku den sa kamalasayan enggu sama bu di 'gkapandus su napas ku.
Pedtigkelan ku su pakagilek a penggulan nengka sa laki, 'gkaawan aku den na inam.
16 Su lipunget'engka na mana mabagel a sambel a pakasugat sa laki;
mana su matay aku den kanu pakagilek-gilek a papegkaidan nengka sa laki.
17 Su entu na mana degan a nakabalibet sa laki kanu kagagabian;
da den 'gkasangulan ku ka biwang kawanan, taligkudan kasangulan na nakabalibet sa laki.
18 Na initangka nengka sa laki su manga pakat ku enggu su manga tagapeda ku,
su kalibutengan bun den i kaped ku.