Su Kabpangeni-ngeni sa Tabang kanu Kadenan a Mapulu
Su pangeni-ngeni nu Daud.
86
Hu Kadenan a Mapulu, pakikineg aku nengka enggu sawal ka su pangeni-ngeni kukagina 'gkalubayan aku den enggu sangat a pakanasisita aku.
2 Tiakapi aku nengka
ka matidtu aku man kanu adapan nengka.
Ilipuas'engka su panunugun nengka a pedsalig sa leka.
Seka man su Kadenan ku.
3 Hu Kadenan a Mapulu, lati aku nengka sa nanam
ka kagagabian na pedtawag aku bu sa leka.
4 Pagkagalaw ka pan su ginawa nu panunugun nengka
kagina san aku man sa leka 'bpangeni-ngeni.
5 Sangat man i kapia nu ula-ula nengka enggu mangampun ka,
dala idsan nu kakalimu nengka kanu langun nu 'bpangeni sa leka sa tabang.
6 Hu Kadenan a Mapulu, pakikineg ka su pangeni-ngeni ku;
pakikineg ka su kapedtawag ku sa leka 'bpangeni sa tabang.
7 Na uman aku pedtala sa kamasengetan na pedtawag aku sa leka
kagina pedsawalen aku nengka man.
8 Hu Kadenan a Mapulu, dala man limbang'engka kanu langun nu pedtawagen sa kadenan
enggu dala man makagaga enggula kanu langun nu penggulan nengka.
9 Su langun na bangsa a inaden nengka na mamakauma
ka semugiud kanu adapan nengka
enggu pugin nilan su suti a ingala nengka.
10 Kagina seka bu man i barakat a Kadenan enggu penggula sa kangagaipan;
seka bu man su kaisa-isa nin a Kadenan.
11 Hu Kadenan a Mapulu, itutulu nengka sa laki su ukit'engka
ka enggu aku makapaguyag-uyag sia luyud kanu bantang;
enggi aku sa ikelas a pamusungan a aden gilek'in kanu ingala nengka.
12 Hu Kadenan a Mapulu a Kadenan ku, pedsukul-sukulan ku seka sa senep kanu atay ku,
pugin ku su ingala nengka taman sa taman.
13 Kagina su sangat a kakalimu nengka sa laki na dala idsan nin,
inilipuas aku nengka sa kapatay ebpun kanu dalepa nu namamatay.
14 Hu Kadenan a Mapulu, 'bpelusudan aku nu manga taw a mapulu i muletad'in;
su lumpukan nu dupang a manga taw na pegkiugan aku nilan 'bpagimatay,
silan su manga taw a di pegkilala sa leka.
15 Ugaid'a seka man a Kadenan na malimu enggu aden lat a nanam'in kanu manga taw nin,
dikena ka malemu malipunget, matidtu ka enggu su sangat a kakalimu nengka na 'bpamelapay.
16 Na ipamamantag aku nengka pan enggu lati aku pan sa nanam;
enggi ka pan sa bagel su panunugun nengka;
ilipuas'engka su wata a mama nu panunugun nengka a babay.
17 Ipailay nengka sa laki su tanda nu kapianan nengka sa laki
asal'a mailay nu manga kuntela ku ka enggu silan makagkaya
kagina seka man su Kadenan a Mapulu i pedtabang sa laki enggu 'bpelimpang sa laki.