Su Pangeni-ngeni sa Kambalingan nu Kapamalihala nu Kadenan
Lu i nia pakatumpa kanu 'gkaunutan nu pasesengal. Su nia a Sengal na inisulat'u manga tupu ni Kura.
85
Hu Kadenan a Mapulu, pinalapay nengka den su kapianan nengka kanu manga taw nengka kanu kalupan nengka;inimbalingan nengka den su kabalabahagian kanu manga tupu nu Yakub.
2 Inampun nengka den su kabaladusan nu manga taw nengka;
pinunas'engka den su langun nu kadupangan nilan.
3 Iniawa nengka den su lipunget'engka;
tinaligkudan nengka den su mapasang a lipunget'engka sa lekami.
4 Hu Kadenan a 'bpamelipuas sa lekami, imbalingan nengka den su kabpamalihala nengka sa lekami,
iawa nengka den su lipunget'engka sa lekami.
5 Ngintu, di den mapupus su lipunget'engka sa lekami?
Ngintu, su lipunget'engka na makagaus pan kanu manga temundug a muliataw nami?
6 Dikena ba seka bun i makapambalingan kanu mapia a kambebetad'ami
asal'a makadsisigalaw kami a manga taw nengka san sa leka?
7 Hu Kadenan a Mapulu, ipailay nengka sa lekami su sangat a kakalimu nengka,
inggay nengka sa lekami su kalipuasan a ebpun sa leka.
8 Na pakikinegen ku man su ngin i kadtalu nu Kadenan a Mapulu
ka inibpasad'in man su kalilintad kanu manga taw nin a matidtu
amaika di silan embalingan kanu galebek a kababalan.
9 Na natatalanged a mangagan den man su kalipuas'in kanu manga taw a magilek sa lekanin
ka enggu su sigay nin na mailay kanu kalupan tanu.
10 Na su sangat a kakalimu nin enggu su katidtu nin na maisa,
maitu bun su kaikelasan nin enggu su kalilintad'in.
11 Su katidtu na mangengetu kanu kalupan
enggu su kaikelasan nin na ipailay nin ebpun sa sulega.
12 Na su Kadenan a Mapulu na ibubus'in su palihala nin
tembu mamelapay su masabpet kanu kalupan tanu.
13 Na su katidtu na mana 'bpangunanan sa lekanin
asal'a maadil'in su 'bpagukitan nin a Kadenan a Mapulu.