Su Kapangingalap sa Kasangul kanu Suti a 'Bpagagaman nu Kadenan
Lu i nia pakatumpa kanu 'gkaunutan nu pasesengal a nia usalen sa kapedsengal lun na sa ukit a kapebpalabuni-bunian a bedtuan sa Gitit. Su nia a Sengal na inisulat'u manga tupu ni Kura.
84
Hu Kadenan a Mapulu a Barakat sa Langun,ngin den i kapia nin su walay a pedtangenan nengka!
2 Hu Kadenan a Mapulu, sangat a 'gkalilinian ku den a benal i kaludep ku kanu manga lama-lama nu walay a 'bpangadapan sa leka.
Su ginawa ku taman kanu pamusungan ku na pakadsengal-sengal sa pugi sa leka a tidtu a Kadenan.
3 Hu Kadenan a Mapulu a Barakat sa Langun a Kadenan ku enggu Datu ku,
apia man su manga papanuk na pedsalag
a masupeg kanu pegkurbanan sa leka
taman sa lu nilan bun ba pedtiakapan su manga pipis'ilan.
4 Ngin den i kapia nin kanu manga taw a lu pegkakaleben kanu walay a 'bpangadapan sa leka
ka lalayun silan makadsengal sa pugi sa leka.
5 Ngin den i kapia nin kanu manga taw a sia pakabpun sa leka su bagel'ilan
enggu nia nilan bu 'gkalilinian na su kabpawang kanu suti a 'bpangadapan sa leka sa Zion.a
6 Na sia kanu kabpelalag'ilan kanu mamala a Kadatalan nu Bakab
na naaden su manga bualan na ig,
na mana minulan ka apia endaw na aden ig'in.
7 Na sia kanu kabpelalag'ilan na 'bpangiseg-'bpangiseg bun su bagel'ilan
taman sa kinauma nilan kanu adapan nu Kadenan sa Zion.
8 Hu Kadenan a Mapulu a Barakat sa Langun a Kadenan nu Yakub,
pakikineg ka pan su pangeni-ngeni ku.
9 Palihalai ka su pegkelung sa lekami
a su datu a pinamili nengka.
10 Ka su sagay bu man a kadtangen ku kanu lama-lama nu suti a 'bpangadapan sa leka
na nia pan mapia kumin kanu sangibu a gay a kadtangen ku kanu ped a dalepa.
Nia ku tinemu i katameng ku kanu pintu nu walay a 'bpangadapan sa leka
kumin sa kagkaleben ku kanu walay nu manga dupang.
11 Ka seka man su Kadenan a Mapulu a mana senang a pakatayaw sa lekami enggu pegkelung sa lekami.
'Bpamalihalan kami nengka kanu limu nengka taman sa pembadtugen kami nengka.
Na di nengka ipedsingit su ngin i mapia
kanu manga taw a 'bpaguyag-uyag sa matidtu.
12 Hu Kadenan a Mapulu a Barakat sa Langun,
ngin den i kapia nin kanu manga taw u pedsalig sa leka.