Su Pangeni-ngeni sa Kataban nu manga Taw a Israil sa kanu manga Kuntela nilan
Su nia a Sengal na inisulat'i Asap.
83
Hu Kadenan a Mapulu, da ka 'bpelenek;da ka pembisu-bisuan sa lekami.
Hu Kadenan, di kami nengka papedtaday.
2 Ka ilay ka pan su manga kuntela nengka, di den silan pamakatuludu sa kabpagatu nilan sa leka,
pedsandag a benal silan sa kapedsungkang'ilan sa leka.
3 Pegkahanda silan sa dikena mapia sungkang kanu manga taw nengka;
namagumpung silan sungkang kanu manga pedtiakapan nengka.
4 Nia nilan 'bpamedtalun na “Sia kanu, ka ibpeden tanu minasa su bangsa a Israil
ka enggu kalipatanan den su ngala a Israil taman sa taman.”
5 Na namagayun man silan langun kanu mawag a kahanda nilan,
minumbal silan sa kapasadan sungkang sa leka.
6 Kaped kanu entu su manga tupu nu Idum enggu Ismail,
su manga taw a Muab enggu Hagiar,
7 su manga taw a Gibal enggu su manga taw a Amun, su manga taw a Amalik,
su manga taw a Pilistia enggu su manga taw a Tair.
8 Apia su manga taw a Asiria na minamung bun,
isa silan a mabagel a tampil'u manga tupu ni Lut.a
9 Na enggula ka kanilan su pinggula nengka kanu manga taw a Midian
enggu kani Sisira enggu Yabin a tinalaw nengka lu kanu lawas'a ig'u Kisun.b
10 Pinangimatayan nengka silan kanu dalepa a Indur,
su bangkay nilan na nangaledak a nabaluy a nakapagkasebud kanu lupa.
11 Pangimatayi ka su 'gkangaunutan nilan a mana su pinggula nengka kani Urib enggu Sib,
isugut'engka bun a matay su manga datu nilan a mana su pinggula nengka kani Siba enggu Salmuna.
12 Na silan i midtalu sa “Agawn tanu su manga pabpanadtaban nu Kadenan ka enggumakeden tanu su entu.”
13 Hu Kadenan ku, itagayak'engka silan a mana libubuk a nasugat'a lipules,c
mana ukap a inibayug'u sambel,
14 mana su apuy a ginemepul kanu damakayu,
mana su kaleg'u apuy a tinemutung kanu manga palaw.
15 Ipadsaluba nengka silan kanu mabagel a bagyu nengka,
pakagileki ka silan kanu sangat i kabandes'in a lipules'engka.
16 Hu Kadenan a Mapulu, ibetad'engka silan kanu sangat a kayayan
ka enggu ka nilan mapangilay.
17 Isugut'engka a makagkayaya silan enggu kukuken na gilek taman sa taman,
isugut'engka a matay silan sia kanu kayayan.
18 Patuntayi ka kanilan i seka bu i kaisa-isa nin
a Kadenan a Mapulu
a su Kadenan a Mapulu sa Langun sia kanu liwawaw nu dunia.