Su Kakalimu nu Kadenan enggu su Kategas'a Ulu nu manga Taw a Israil
Lu i nia pakatumpa kanu 'gkaunutan nu pasesengal a nia usalen sa kapedsengal lun na sa ukit a kapebpalabuni-bunian a bedtuan sa Gitit. Su nia a Sengal na inisulat'i Asap.
81
Edsengal kanu sa matanug a pugi kanu Kadenan a kelung tanu;edsengal kanu sa matanug sa aden kagalaw nin kanu Kadenan a pedsimban nu Yakub.
2 Edsengal kanu enggu edtambul kanu,
pauni nu su palabuni-bunian a kutiapi a mapia i uni nin enggu su palabuni-bunian a alpa.
3 Yup'u su tambuli kanu kapedsela-sela sa timpu na bagu a ulan-ulan,
maitu bun kanu timpu na kalinawag'u ulan-ulan sa kanu gay nu kapedsela-sela.
4 Kagina isa i nia a pangitaban kanu manga taw a Israil
a kasuguan nu Kadenan a pedsimban nu Yakub.
5 Inumbal'u Kadenan i nia a kasuguan kanu tupu nu Yusupa
sa kanu timpu a kinapaliu nin kanilan kanu kalupan nu Egypt.
Na aden nakineg ku a suala a di ku katawan u entain i kigkuan lun
6 sa nia nin pedtalun na “Iniawa ku su maugat a 'bpamusayn nu waga nu;
da den maugat a 'bpananggiten nu.
7 Na kanu kapedtala nu sa kapasang na tinemawag kanu sa laki, na inilipuas ku mambu sekanu;
sinawal ku mambu sekanu ebpun kanu makapal a gabun;
tinepeng ku sekanu sa ukit a dala nailay nu a ig kanu bualan nu Miriba.
8 Hu sekanu a manga taw ku, pakikineg'u su papata ku sa kapaingat sa lekanu.
Hu sekanu a manga taw a Israil, na mapia den a benal u pakikinegen aku nu!
9 Dait a dala apia ngin a pegkakadenanen san sa lekanu,
da kanu a benal semimba kanu manga entu.
10 Saki man su Kadenan a Mapulu a Kadenan nu
a napaliu sa lekanu kanu kalupan nu Egypt.
Pangeni nu sa laki su manga nasisita nu ka inggay ku sa lekanu.
11 “Ugaid'a da pakikinega nu manga taw ku a Israil su suala ku;
dala aku nilan paginuguti.
12 Tembu pinadtaday ku silan kanu kangategas'u ulu nilan
taman sa pinggula nilan su ngin i kiug'a ginawa nilan.
13 Ngin den man i kapia nin u mana bu ka 'bpakikinegen aku nu manga taw ku a Israil
enggu 'bpaguyag-uyag silan sia luyud kanu manga kahanda ku,
14 ka pamagayasan ku mapasangkup kanilan su manga kuntela nilan
taman sa siksan ku su manga kuntela nilan.
15 Na su 'gkabensi kanu Kadenan a Mapulu na kagilekan taman sa makasugiud kanu kaadapan nin
enggu su kasiksan nilan na dala kapegkapupus'in.
16 Ugaid'a su sekanu a manga taw ku na enggan ku sekanu sa mapia sa langun a bantad
enggu teneb a ebpun kanu mangasela a watu taman sa mangausug kanu.”