Su Pangeni-ngeni sa Kalipuas'u Kadenan kanu manga Taw a Israil
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Manga Ulak a Lili nu Kapasadan.” Su nia a Sengal na inisulat'i Asap.
80
Pakikineg kami pan, Hu seka a nan a Pedtuganul kanu manga taw a Israil,Hu seka a Kadenan a nangunanan kanu tupu nu Yusup a mana manga bili-bili nin!
Hu seka a Kadenan a 'bpagagayan kanu kulesi nin sia kanu pageletan nu aden manga papak'in a malaikata na itayaw nengka su sigay nengka
2 sia kanu tupu nu Ipraim, Buniamin enggu Manasi.
Na ipailay nengka su kapegkagaga nengka,
'bpawangi kami ka enggu kami nengka malipuas!
3 Hu Kadenan, pagkabagel kami nengka 'bpaluman;
ipagedam'engka sa lekami su kapianan nengka ka enggu kami malipuas.
4 Hu Kadenan a Mapulu a Kadenan a Barakat sa Langun,
ngin i kauget'a kapegkalipunget'engka kanu manga taw nengka ka di nengka pedsawalen su manga pangeni-ngeni nilan sa leka?
5 Papegkanen nengka silan sa lidu na ginawa
enggu nia nengka ipebpaginum kanilan na sakalanggungan den na lu na mata.
6 Na binaluy kami nengka a 'gkapamagukagan nu manga pagubay nami a manga bangsa;
su manga kuntela nami na pedtatawan kami nilan bu.
7 Hu Kadenan a Barakat sa Langun, pagkabagel kami nengka 'bpaluman;
ipagedam'engka sa lekami su kapianan nengka ka enggu kami malipuas.
8 Su manga taw nengka na mana pamumulanen a ubas a init'engka ebpun sa Egypt,
pinaawa nengka su manga bangsa kanu kalupan ka pinagkaleben nengka silan lu ba.
9 Lininawagan nengka kanilan su kalupan a entu;
namendalig su pamumulanen a ubas taman sa nakalapat kanu kalupan.
10 Na nasilungan nin su manga palaw,
nasilungan nu manga sapak'in su mangasela a kayu a sidar,
11 su manga sapak'in na nakauma kanu lagat'u Miditiranian,
su manga taluad'in na nakauma kanu lawas'a ig'u Yupratis.
12 Ugaid'a saguna, na gineba nengka su manga alad a pakadalinding kanilan
tembu su langun na pedsagad na pegkua kanu manga unga nin.
13 Na pendaletan bu pegkan nu manga taw sa lupa a lu kanu damakayu,
su manga malanap-lanap kanu maliwanag na pegken nilan su entu.
14 Hu Kadenan a Barakat sa Langun, embalingan ka den sa lekami;
na iganat sa sulega na sandeng kami pan;
tiakapi kami pan a mana su pamumulanen a ubas
15 a su kawanan a lima nengka demun i namula lun enggu seka bun i napagkasela lun.
16 Na su manga kuntela na pinanebped'ilan enggu pinanutung'ilan su entu;
isugut'engka a malangiap silan sa kagkedes bu nu kilay nengka.
17 Ugaid'a saguna na isugut'engka a kadapenetan nengka su san a entu kanu kawanan nengka a pinamili nengka
enggu pinagkabagel'engka sa leka a kabadtugan.
18 Na amaika maitu, na di nami a benal seka taligkudan;
pambangun kami nengka 'bpaluman ka enggu nami masimba su ingala nengka.
19 Hu Kadenan a Mapulu a Kadenan a Barakat sa Langun, pagkabagel kami nengka 'bpaluman;
ipagedam'engka sa lekami su kapianan nengka ka enggu kami malipuas.