Su Kalipuasan nu Bangsa a Israil
Su nia a Sengal na inisulat'i Asap.
79
Hu Kadenan a Mapulu, na sinakup'u manga bangsa su kalupan nengka,pinggiabuan nilan su Suti a 'Bpagagaman sa leka,
bininasa nilan sa tidtu-tidtu su siudad a Awrusalim.
2 Su manga bangkay nu manga panunugun nengka
na inipakan nilan kanu manga papanuk sa kawang-kawang,
su sapu nu 'gkangasaligan nengka na inipakan nilan kanu manga talaw a binatang kanu liwawaw nu dunia.
3 Su manga lugu nu manga taw nengka na mana ig a nakatuga kanu lupa a nakalanag
kanu embala-bala sa Awrusalim.
Na apia sakataw na dala demun linemebeng kanu bangkay nilan.
4 Naumbal kami a nadtatawan nu manga pagubay nami a dalepa;
su manga bangsa a nakabalibet sa lekami na 'bpagumpaken kami nilan enggu pedsudian.
5 Hu Kadenan a Mapulu, na ngin i kauget'u kapegkalipunget'engka sa lekami?
Ngintu, di den mapupus su kapegkalipunget'engka sa lekami?
Ngin i kauget'u kabpangalikud'engka a mana apuy a pakatutung?
6 Lu nengka man ibubus su lipunget'engka kanu manga bangsa a di 'bpaginugut sa leka,
lu kanu manga pendatuan a di 'bpamedsimba sa leka.
7 Kagina inimatayan nilan su manga tupu nu Yakuba
enggu bininasa nilan su pendalepan nilan.
8 Di kami nengka pedsiksa sabap kanu kinambaladusa nu manga kaapuan nami;
saguna na lati kami den sa nanam
ka sangat a pegkalubay kami den.
9 Hu Kadenan a 'bpamelipuas sa lekami, tabangi kami den
ka enggu mapugi su ingala nengka.
Ilipuas kami nengka enggu ampun ka su kabaladusan nami
ka enggu mabadtug su ingala nengka.
10 Di ka pedsuguti su manga bangsa a madtalu nilan i
“Endaw su Kadenan nilan?”
Suguti kami sa kambamatan nami su kasiksa nengka kanu manga bangsa
a suli nengka kanilan sabap kanu kinapatuga kanu lugu nu manga panunugun nengka.
11 Pakikineg ka su kabpangeni sa tabang'u manga taw nengka a nangabilanggu;
na sia makanggulalan kanu dala idsan nin a kapegkagaga nengka na ilipuas'engka silan kanu nanget a kapatay.
12 Hu Kadenan a Mapulu, imbalingan nengka sa makapitu matakep kanu manga pagubay nami a dalepa
su kapapegkaya a pinggula nilan sa leka.
13 Na su sekami mambu a manga taw nengka a mana manga bili-bili a pedtiakapan nengka
na pugin nami seka taman sa taman;
pugin nami seka taman sa kanu mamakatundug pan a manga muliataw nami.