Su Ukit'a Kapianan nu Kadenan kanu manga Taw nin
Su nia a Sengal a mapia i kinaumbal lun na inisulat'i Asap.
78
Sekanu a manga taw ku, pakikineg'u su manga panduan ku,su manga tangila nu na ipakikineg'u sa mapia kanu manga kadtalu ku.
2 Su pedtalun ku a nia na sa ukit a pakenalan;
pedtalu aku sa manga kadtalu a nakapagena i maena nin pantag kanu nanganggula paganay
3 a nangakineg tanu den enggu nangatawan tanu den,
ka pinanudtul den i nia sa lekitanu nu manga kaapuan tanu.
4 Na di tanu i nia ipagena kanu manga muliataw tanu;
panudtulen tanu su nia kanu manga makatundug pan a manga muliataw tanu,
panudtulen tanu kanilan su makapantag kanu kabarakat'u Kadenan a Mapulu,
su bagel'in enggu su manga makagaip a pinggula nin.
5 Inaden nu Kadenan su atulan nin
enggu inenggay nin su kasuguan kanu manga taw a Israil a tupu nu Yakub.
Inisugu nin kanu manga kaapuan tanu i ipamandu nilan su entu
kanu manga wata nilan
6 ka enggu su mamakatundug a muliataw nilan a da pan mambata na katawan nilan bun su entu
taman sa makapamandu nilan bun kanu manga temundug pan a muliataw nilan.
7 Na kanu maitu ba a ukit na kaadenan na salig kanu Kadenan su mamakatundug pan a muliataw
enggu di nilan kalipatanan su manga pinggula nu Kadenan
taman sa inggulalan nilan su entu a manga kasuguan nin.
8 Na amaika maitu na di silan mamakailing kanu manga kaapuan nilan
a mangategas i ulu nin enggu manga sungkang;
da nilan padsatimana su ginawa nilan kanu Kadenan enggu dikena senep sa atay su salig'ilan sa lekanin.
9 Mana silan su manga sundalu nu dalepa a Ipraim a nakanggumatalem sa busug
ugaid'a guna su pembunua den silan na namakapalalaguy silan.
10 Dala silan embalituman kanu kapasadan nilan kanu Kadenan
taman sa inikias'ilan i kaunut'ilan kanu manga kasuguan nin.
11 Nalipatanan nilan su manga pinggula nu Kadenan
enggu su manga kagaipan a inipailay nin kanilan.
12 Na sia kanu kaadapan nu manga kaapuan tanu na pinggula nin su kangagaipan
kanu kadatalan nu Suan, lu kanu kalupan nu Egypt.
13 Pinadsisi nin su lagat ka pinaukit'in silan lu ba,
inumbal'in su ig a mana nakalending kanu duakambala a ligid.
14 Na sia kanu timpu na malamag na 'bpangunanan nin silan sa ukit'a gabun
enggu sia menem kanu timpu na magabi na 'bpangunanan nin silan sa ukit'a katayaw nu pegkaleg a apuy.
15 Tinebi nin su mangasela a watu kanu tawan-tawan a dalepa;
pinatuga nin su ig ebpun kanu kadaleman kanu didalem'u lupa asal'a mainem'u manga kaapuan tanu.
16 Na ebpun kanu watu na tinemuga su ig,
na mana den lawas'a ig su leges'in.
17 Ugaid'a su manga kaapuan tanu na pebpapanalusen nilan bun su kapembaladusa nilan kanu Kadenan,
sinungkang'ilan su Kadenan a Mapulu sa Langun lu kanu tawan-tawan a dalepa.
18 Binatalu nilan sekanin
sa ukit a kinapangeni nilan lun sa makan a 'gkalilinian nilan.
19 Pinagumpak'ilan su Kadenan sia kanu kinadtalu nilan lun sa
“Ngintu, kaenggan tanu nu Kadenan sa makan kanu tawan-tawan a nia a dalepa?
20 Na apia man tinebi nin su watu asal'a makatuga su ig
taman sa linemapay mambu su entu,
na ngintu, makapangaden ba sekanin sia sa makan
atawa ka sapu na binatang a makaenggay nin kanu manga taw nin?”
21 Tembu, guna makineg'u Kadenan a Mapulu su entu na sangat a nalipunget sekanin.
Su lipunget'in na mana apuy a nakatutung kanu manga tupu nu Yakub a su manga taw a Israil
22 kagina dala man salig'ilan kanu Kadenan
enggu di silan 'bpaginugut sa ilipuas'in silan.
23 Ugaid'a apia ka maitu, na inisugu nin kanu langit
i maguka su manga pintu nu sulega
24 ka pinaulan nin sa makan a bedtuan sa manna ka enggu nilan makan;
inenggan nin silan sa kauyagan a ebpun sa sulega.
25 Nakan nu manusia su pegken nu manga malaikat,
inenggan nin silan sa endaw taman i magaga nilan keman.
26 Pinasanggiup'in su sambel a ebpun sa sebangan
enggu pinasanggiup'in bun su sambel a ebpun sa laya sia nakanggulalan kanu kapegkagaga nin.
27 Pinaulan nin sa manga sapu na papanuk a mana den kadakel'u libubuk kanu lupa
atawa ka mana den kadakel'u pedtad kanu dedsan.
28 Na lu nin i entu pinadudsuk kanu pidtangenan nilan a dalepa,
nakabalibet su entu kanu embala-bala kanu manga balung-balung'ilan.
29 Na inilutu nilan su entu enggu pinangan nilan taman sa nangausug silan
ka inenggay man nu Kadenan kanilan su ngin i nalilinian nilan.
30 Ugaid'a dala pamun gaid silan mabulung kanu kapegkan nilan
ka da nilan pamun malamed su inisungit'ilan
31 na nakatingguma menem su lipunget'u Kadenan kanilan.
Inimatayan nin su mangabagel sa langun a manga mama nilan
a su mangapia sa langun a manganguda a manga taw a Israil.
32 Ugaid'a apia ka maitu, na papedtalusen nilan bun su kapembaladusa nilan;
di bun silan 'bpaginugut kanu manga makagaip a pinggula nu Kadenan.
33 Na sabap sa entu na pinamagayasan nu Kadenan temebped su manga napas'ilan
sia nakanggulalan kanu nakatekaw demun nakatingguma a tiuba kanilan.
34 Na guna su inimatayan den nu Kadenan su ped kanilan
na midtataubat silan enggu nangadap silan 'bpaluman kanu Kadenan.
35 Nagkalendem'ilan i su Kadenan su mana masela a watu a kelung'ilan,
su Kadenan a Mapulu sa Langun i 'bpelipuas kanilan.
36 Ugaid'a pinagumpak'ilan sekanin
ka su 'bpameliu kanu ngali nilan na kabudtud bu.
37 Dikena senep sa atay i kabpaginugut'ilan sa lekanin
enggu dala silan embalituman kanu kapasadan a inumbal'u Kadenan kanilan.
38 Ugaid'a apia ka maitu, na linatan bun silan sa ginawa nu Kadenan,
inampun nin su manga dusa nilan
enggu da nin silan ibpeda minasa.
Kinumpen nin su lipunget'in kanilan
sa apia nia nin kaaden i 'gkalipunget den a benal sekanin kanilan.
39 Napagitung'in i manusia bu silan,
mana bu silan sambel a pedsagad a di den makambalingan.
40 Tatap man silan pedsungkang sa lekanin lu kanu tawan-tawan a dalepa
enggu sangat a pinasegad'ilan su ginawa nu Kadenan lu ba.
41 Na pibpapalumanan nilan man matalu su Kadenan,
sinakit'ilan su ginawa nu kaisa-isa nin a Suti a Kadenan nu manga taw a Israil.
42 Linipatanan nilan su kapegkagaga nin,
linipatanan nilan su gay a kinalipuas'in kanilan kanu manga kuntela nilan.
43 Linipatanan nilan su inipailay nin a manga tanda a kangagaipan lu sa dalepa a Egypt,
lu kanu kadatalan nu dalepa a Suan.
44 Na binaluy nin a lugu su manga lawas'a ig
ka enggu di mainem'u manga taw a Egypt su ig kanu manga lawas'a ig.
45 Napatingguma sekanin sa sangat i kadakel'in a langaw
enggu manga babak a makasiksa kanilan.
46 Inipakan nin kanu manga tapudi su manga pamumulan nilan
enggu su manga unga nu 'gkangasabpet'ilan.
47 Napaulan sekanin sa ilu a nakabinasa kanu manga pamumulanen nilan a ubas
enggu bininasa nin bun su manga kayu a sikamur sa ukit'a kinapanamug'in sa mana ilu.
48 Napaulan sekanin sa ilu enggu pinatalas'in su kilat a nakapatay kanu manga pangangayamen nilan
a manga bili-bili enggu manga sapi.
49 Na sabap kanu sangat a kapegkalipunget'u Kadenan kanilan
na sangat a pinakapasangan nin silan, pinatingguma nin su tiuba kanilan
sia nakanggulalan kanu manga malaikat'in a 'bpaminasakan.
50 Da man kumpena nu Kadenan su lipunget'in kanilan;
da nin silan lasama kanu kapatay
ka pinatingguma nin su tiuba a sabapan a kinapatay nu kadakelan kanilan.
51 Inimatayan nin su langun nu kaka sa langun a manga wata a mama nu manga taw a Egypt,
su paganayan a unga nu kamamai nu tupu nu Ham.
52 Ugaid'a su manga taw nin na pinangunanan nin lemiu kanu dalepa a Egypt a mana su manga bili-bili,
tiniakapan nin silan kanu tawan-tawan a dalepa.
53 Tinapid'in silan ka enggu di silan kagilekan
ugaid'a su manga kuntela nilan menem na nangaled kanu lagat.
54 Init'in su manga taw nin lu kanu suti a dalepa nin,
kanu palaw a nakua nin sia nakanggulalan kanu kapegkagaga nin.
55 Pinaawa nin su manga bangsa kanu entu a kalupan;
pinamagumun nin su entu kanu manga tupu nu Israil a makabpusaka kanilan
taman sa lu nin ba silan pinagkaleben.
56 Ugaid'a apia ka maitu, na binatalu nilan bun su Kadenan a Mapulu sa Langun,
sinungkang'ilan sekanin.
Da nilan unuti su manga kasuguan nin
57 ka makin nilan tinaligkudan su Kadenan, mana bun silan kanu manga kaapuan nilan a dala salig'in sa lekanin;
mana silan migkalat a busug a di kasaligan.
58 Ka sinakit'ilan man su ginawa nu Kadenan;
pinapapangalikud'ilan sia kanu kinasimba nilan kanu manga balahala lu kanu mangapulu a dalepa.
59 Tembu guna mailay nu Kadenan su entu, na sangat a nalipunget sekanin
taman sa inikias'in su manga taw a Israil.
60 Inawan nin su walay a pedsimban sa lekanin lu sa dalepa a Silu
a pidtangenan nin sia sa dunia.
61 Inisugut'in a maagaw nu manga kuntela su Kaun nu Kapasadan
a tanda nu kapegkagaga nin enggu sigay nin.
62 Na sabap kanu lipunget'in kanu manga taw nin a mana nin pusaka
na inisugut'in a matay silan nu manga kuntela nilan.
63 Su manganguda nilan na namamatay na apuy
tembu su manga laga nilan na da den nakapangaluma lun.
64 Na su 'bpamangurban kanilan na namamatay na sundang
enggu dala nin isugut i kagagawan nu manga balu nilan su kinapatay nilan.
65 Guna maipus su entu na su Kadenan a Mapulu, na mana nakagedam kanu kinatulug'in,
mana sekanin pabubunua a pinagkawalaw nu makalangut a 'bpaginumen.
66 Binugaw nin su manga kuntela;
pinagkaya nin silan taman sa taman.
67 Inikias'u Kadenan su tupu nu Yusup,
da nin bun pamilia su tupu nu Ipraima
68 ka nia nin pinamili na su tupu nu Yahuda,b
pinamili nin su palaw a Zion a pinadtaya nin.
69 Lu nin ba pinatindeg su suti a walay a 'bpangadapan sa lekanin a mana pakasugku sa langit i kalambeg'in
enggu mana su dunia a pinatindeg'in sa mabagel taman sa taman.
70 Pinamili nin su Daudc a panunugun nin,
kinua nin sekanin kanu kapedtuganul'in sa manga bili-bili.
71 Kinua nin kanu kapedtuganul'in sa manga bili-bili nu ama nin
ka pinamili nin a makapangulu kanu manga taw a Israil a manga taw nin a mana nin pusaka.
72 Tinuganul silan nu Daud a mana manga bili-bili nin sa senep sa atay
enggu pinanguluan nin silan sa mapia.