Su Kalimpang kanu Timpu na Kapegkalidu nu Ginawa
Lu i nia pakatumpa kanu 'gkaunutan nu pasesengal a si Yidutun. Su nia a Sengal na inisulat'i Asap.
77
Hu Kadenan, 'bpananawag aku sa leka sa kabpangeni ku sa tabang;'bpananawag aku sa matanug asal'a mapakikineg aku nengka.
2 Sia kanu timpu nu kapegkalidu nu ginawa ku
na 'gkapangilay ku seka a Kadenan a Mapulu.
Na kanu kalalamagan na ipegkayang ku bu su lima ku sa kabpangadap ku sa leka
ugaid'a di bun 'gkalimpang su ginawa ku.
3 Hu Kadenan, amaika 'gkagkalendem ku seka na 'gkapanawag ku seka,
uman ku seka 'gkapamikil na 'gkalubayan i ginawa ku.
4 Di aku nengka den papedtulugen,
di ku den katawan u ngin i edtalun ku sabap kanu sangat a kapegkalingasa nu ginawa ku.
5 Nagkalendem ku su sinemagad a manga timpu
enggu su minukit a manga lagun.
6 'Gkagkalendem ku su manga timpu a kapedsengal-sengal ku sa uman magabi,
sia kanu kabpamikil ku na nia pakaidsa nu ginawa ku na
7 “Ngintu, taligkudanan aku den nu Kadenan a Mapulu taman sa taman?
Ngintu, di nin den ipagedam 'bpaluman sa laki su kapianan nin?
8 Ngintu, nadala den su sangat a kakalimu nin sa laki taman sa taman?
Ngintu, su manga pasad'in na di nin den tumanen taman sa taman?
9 Ngintu, linipatanan nin den su lat a nanam'in?
Ngintu, sabap kanu lipunget'in su kinadala nu lat a nanam'in?”
10 Nia nadtalu nu ginawa ku na “Sangat a nakalidu kanu ginawa ku i su Kadenan a Mapulu sa Langun na di aku nin den pedtabangan.”
11 Hu Kadenan a Mapulu, 'gkagkalendem ku su langun nu pinggula nengka,
'gkagkalendem ku su pinggalebek'engka a kangagaipan kanu nangaipus a timpu,
12 'bpamikilen ku su langun nu pinggalebek'engka
enggu su manga kagaipan a pinggula nengka.
13 Su ukit'engka na dala man pagidsan nin, dala den man nadtalu a kadenan a lemawan pan sa leka a Kadenan.
14 Hu Kadenan, na seka man i penggula kanu manga kagaipan.
Inipailay nengka kanu manga bangsa su kabarakat nengka.
15 Sia kanu kapegkagaga nengka na inilipuas'engka su manga taw nengka a tupu nu Yakub enggu Yusup.
16 Hu Kadenan, guna ka mailay nu manga ig
na kinemegkel'a gilek,
apia su kadaleman nu ig na nakadsimbual sa kinagilek'in sa leka.
17 Na ebpun kanu manga gabun na nakabubus su ulan,
linemugung kanu kawang-kawangan.
Namedtalas su kilat kanu embala-bala.
18 Su lugung'engka na 'gkakineg kanu embala-bala a ebpun kanu mabagel a lipules,
su kilat'engka na pakapagkaliwanag'in su dunia
tembu nagayangkeng su embala-bala kanu dunia.
19 Na linalakawan nengka su lagat,
lu ka minukit kanu madalem a lagat a sangat i kabagel'u bagel'in
ugaid'a dala nailay a lad'u ay nengka.
20 Pinangunanan nengka su manga taw nengka a mana su manga bili-bili,
pinangunanan nengka silan sia nakanggulalan kanu Musa enggu Harun.