Su Kadenan i Pegkukum kanu Langun nu Taw sa Dunia
Lu i nia pakatumpa kanu 'gkaunutan nu pasesengal a nia usalen na palabuni-bunian a aden iket'in. Su nia a Sengal na inisulat'i Asap.
76
Su manga taw sa dalepa a Yahuda na kilala nilan a benal su Kadenan,su ingala nin na sangat a 'bpagadatan sia kanu dalepa a Israil,
2 lu sekanin pegkaleben kanu dalepa a Awrusalim,
lu kanu palaw a Zion.
3 Na lu nin ba pinanebped su pegkaleg a asad'u manga busug,
bininasa nin bun su manga kelung, su manga sundang enggu su manga matalem sa kapembunua.
4 Hu Kadenan a pedsigay, su kabarakat'engka
na lawan pan kanu kabagel'u manga palaw.
5 Kinua nengka kanu manga mawalaw a sundalu su manga nakua nilan a langun-taman,
langun nilan na namamatay;
dala den isa kanu manga pabubunua
i makausal pan kanu manga matalem'ilan.
6 Hu Kadenan a pedsimban nu Yakub, su kinasapal'engka bu
na namamatay den su manga pakukuda enggu su manga kuda nilan.
7 Tembu dait man a ikagilek ka.
Entain ba man i makagaga edtindeg kanu kaadapan nengka amaika 'gkalipunget ka?
8 Na iganat sa sulega na inipayag'engka den su kabpangukum'engka,
na nagilekan su dunia enggu namelenek silan.
9 Na guna ka edtindeg ka kinemukum ka den
na nakalipuas su langun nu 'gkangaumis sia sa dunia.
10 Natalatantu a su lipunget'engka kanu manusiaa na makapugi sa leka.
Na su taw a namakalipuas na simban ka nin kanu timpu na kapedsela-sela sa leka.
11 Na 'bpasad tanu kanu Kadenan a Mapulu taman sa tumanen tanu su entu;
su langun na bangsa kanu embala-bala na dait a mamananggit sa igkurban nilan sa lekanin
a Kadenan a dait a ikagilek.
12 Ipembaba nin su 'gkangaunutan a pebpapulu
enggu su manga datu kanu dunia na ipegkagilek'ilan sekanin.