Su Kadenan i Mangukum
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Di Binasan.” Su nia a Sengal na inisulat'i Asap.
75
Hu Kadenan nami, pedsukul-sukul kami sa leka;pedsukul-sukul kami sa leka ka pedtapiden kami nengka.
Su manga taw na ipebpayag'ilan su manga makagaip a pinggula nengka.
2 Hu Kadenan, nia nengka pan kadtalu na “Aden inadil ku a kutika
a kukumen ku sa wagib su manga taw.
3 Na amaika magayangkeng su dunia enggu su langun na 'bpamegkaleben lun ka kemegkel den silan na gilek,
na saki i mapagkabagel kanu udsadan nu dunia.
4 Na nia ku kadtalu kanu manga taw a masandag na “Da kanu pedsandag,”
enggu su sekanu menem a manga dupang na “Di nu ibpemamasela su kapegkagaga nu.
5 Da kanu 'bpemamasela,
da kanu pedtalu sa kasandag.”
6 Kagina su kambantas na dikena ebpun sa sebangan atawa ka sedepan
enggu dikena bun ebpun sa tawan-tawan a dalepa,
7 ka su Kadenan bu man i 'bpangukum kanu manusia,
u entain i ipembaba nin enggu entain menem i ipebpulu nin.
8 Ka su Kadenan a Mapulu i pegkapet kanu tagayana a napenu na lipunget'in
a mana pembula-bula a pinagkadsem a 'bpaginumen a sinimbulan sa manga tinu;
na ibubus'in su entu
ka ipainum'in kanu langun nu taw a dupang taman sa dala masama nilan lun a apia sadtak.
9 Ugaid'a saki na dala pinda na kapebpayag ku kanu pinggula nu Kadenan;
pedsengal aku sa pugi sa lekanin a Kadenan a pedsimban nu Yakub.
10 Nia pan kadtalu nu Kadenan na “Iawa ku su langun nu kapegkagaga nu manga dupang a taw,
ugaid'a isegan ku bun su kapegkagaga nu manga matidtu a taw.”