Su Pangeni-ngeni kanu Kalipuas'u Bangsa
Su nia a Sengal a mapia i kinaumbal lun na inisulat'i Asap.
74
Hu Kadenan, ngintu ka inikias kami nengka? Ngintu, taman sa taman den i nia ba?Ngintu ka su lipunget'engka kanu manga taw nengka a pedtuganulen nengka na mana pedtapuk a bel?
2 'Gkalendem kami nengka a manga taw a pinamili nengka iganat pan kanu nangauget den a timpu,
su manga taw a inilipuas'engka a pinamili nengka a tribu.
'Gkalendem ka su Palaw nu Zion a pigkalebenan nengka.
3 Edsuliman ka sa mapia su Suti a 'Bpagagaman sa leka a sangat a nabinasa den;
edsuliman ka u panun i kinabinasa lun nu manga kuntela.
4 Su manga kuntela nengka na 'bpamelalis lu kanu Suti a 'Bpagagaman sa leka;
tinemunggul silan sa manga pandi a tanda na kinapanaban nilan.
5 Pinanebped'ilan sa kapa su ngin i lu kanu Suti a 'Bpagagaman sa leka a mana silan manga taw a 'bpanebped sa kayu lu kanu damakayu a kapa i 'bpagusalen nilan.
6 Bininasa nilan su langun na pinangukilan,
pinangapa nilan enggu pinamupuk'ilan.
7 Tinutung'ilan su walay a pedsimban sa leka taman sa nalundus;
pinggiabuan nilan su walay a 'bpangadapan kanu ingala nengka.
8 Nia kadtalu nu ginawa nilan na “Lupet-lupeten tanu silan.”
Hu Kadenan, tinutung'ilan su langun na walay a pendidilimudan a walay a 'bpangadapan sa leka.
9 Da den 'gkailay nami a manga tanda sa kaped'ami seka,
dala den nasama a manga nabi
enggu dala isa bu a makadtalu sa ngin i kauget'u nia.
10 Hu Kadenan, ngin pan i kauget'a kapagkaya sa leka nu manga kuntela nami?
Ngintu, sugutan nengka silan sa sakutun nilan su ingala nengka taman sa taman?
11 Ngintu ka di kami nengka pedtabangan?
Binasa ka den silan sia makanggulalan kanu kabarakat'engka!
12 Hu Kadenan, seka man i datu ku iganat pan kanu nangauget den a timpu,
seka i 'bpamelipuas sia sa dunia.
13 Pinadsisi nengka su lagat sia nakanggulalan kanu kabarakat'engka.
Linupet-lupet'engka su manga ulu nu manga naga nu manga ig.
14 Ginesa-gesa nengka su ulu nu Libiatan;a
inipakan nengka su lawas'in kanu manga balangiawa kanu tawan-tawan a dalepa.
15 Seka i papedtuga kanu manga bualan enggu kanu manga lawas'a ig;
na su manga lawas'a ig a di 'gkailatan na pinakailatan nengka.
16 Seka i nangaden kanu malamag enggu kanu magabi;
seka bun i nangaden kanu ulan-ulanb enggu kanu senang.
17 Seka i minetad kanu langun na endulunan nu dunia;
seka i nangaden kanu timpu na kabpanenang enggu kanu timpu na kabpanenggaw.
18 Hu Kadenan a Mapulu, di ka 'bpelipatani su kapapegkaya nu kuntela sa leka
enggu su kinanggiabu nu manga babal a taw kanu ingala nengka.
19 Di ka ibpagenggay su umul'u manga taw nengka a mana malapati sa kanu manga dupang a taw a mana talaw a binatang;c
di ka 'bpelipatani taman sa taman su manga taw nengka a 'gkapasangan.
20 'Gkalendem ka su kapasadan nengka sa lekami
kagina nakapayapat den su kadaluakan kanu manga malibuteng a dalepa kanu nia a kalupan.
21 Di ka semuguti a makagkaya su 'gkangaumis;
isugut'engka a mapugi nu manga taw a miskinan enggu pakanasisita su ingala nengka.
22 Hu Kadenan, embangun ka, ka ipailay nengka i nakawagib ka;
'gkalendem ka su kapapegkaya sa leka nu manga taw a nan a babal.
23 Di ka papedtaday su kabpelalis'u manga kuntela nengka a 'gkabensi sa leka,
su kabpelalis'ilan na da den pinda nin.