Ikatelu a Libelu
(Sengal 73 — 89)
Su Manggula nu Taw a Ikelas i Atay nin enggu su Taw a Dupang
Su nia a Sengal na inisulat'i Asap.
73
Saben-sabenal a sangat i kapia na ukit'u Kadenan kanu manga taw a Israilenggu kanu manga taw a ikelas i atay nin.
2 Ugaid'a paidusama na kaawan aku na salig kanu Kadenan,
paidusama na makasibay su salig ku kanu Kadenan
3 kagina nadsekelan ku su mangasandag a taw
enggu su kinailay ku kanu kapegkapia na kambebetad'u manga taw a dupang.
4 Di silan pakaukit sa mapasang,
su lawas'ilan na tatap mapia enggu mabagel.
5 Di silan 'gkapasangan, dikena mana su ped a taw;
di 'gkalidu i ginawa nilan, dikena mana su ped a taw.
6 Tembu su kasandag'ilan na binaluy nilan a mana balig a nakaselub kanu lig'ilan,
su kadupang'ilan na inumbal'ilan a mana balegkas a pakabaus kanu badan nilan.
7 Su pamusungan nilan na napenu na kanggalebek sa dikena mapia;
nia nilan bu 'gkapagitung na kanggula sa mawag.
8 Masudi silan enggu pedtalu-talu sa mawag kanu ped a taw;
'bpemamasela silan sa kapegkahanda nilan sa kaumis kanu ped a taw.
9 Su ngali nilan na pedtalu-talu sa mawag a sungkang kanu Kadenan a lu sa sulega,
su dila nilan na pedtalu-talu sa kasandag pantag kanu ngin i pinggula nilan sia sa dunia.
10 Tembu apia su manga taw nu Kadenan na 'bpakikineg kanilan
enggu 'bpaginugut kanu manga kadtalu nilan.
11 Nia nilan kadtalu na “Di man 'gkatawan nu Kadenan su penggulan tanu,
dala man sabut-sabut'u Kadenan a Mapulu sa Langun kanu 'gkanganggula.”
12 Na maya ba i uyag-uyag'u manga taw a dupang:
dala lidu na ginawa nilan enggu 'bpangiseg i kapegkawasa nilan.
13 Tembu napagitung ku i dala bun besen katagan nin i kabpaginapas ku sa ikelas a atay
enggu su kabpaginapas ku sa di kabudsengan su lima ku sa mawag a galebek.
14 Na kanu dalem'u kagagabian na 'gkalasay aku bu
enggu uman mapita na pedsiksan aku nengka bu.
15 Na amaika menem ka edtalun ku su kadtalu nu manga dupang a entu
na mana ku bun tinipu su manga taw nengka.
16 Na 'bpagapasen ku a benal i katuntay ku kanu langun nu entu
ugaid'a malegen ku a benal pedsabuten.
17 Ugaid'a guna su linemu aku kanu suti a 'bpangadapan sa leka
na entu pan ba ka natuntayan ku u ngin i kadadsangan nu manga taw a dupang.
18 Saben-sabenal a ipembetad'engka silan kanu malindeg a lalan,
idtug'engka silan kanu kabinasan.
19 Na sakelap-mata bu na mabinasa silan,
makagilek a benal i ukit a kapatay nilan.
20 Mana bun silan taginepen a madadag bun endaw i kagedam'ilan.
Hu Kadenan a Mapulu, na sia kanu kambugkalaw nengka na mangalangiap silan.
21 Na kanu kinasakit kanu pamusungan ku
enggu kinapangusul'u ginawa ku
22 na nakailing aku sa mana palangay na binatang kanu kaadapan nengka.
Naawan aku na akal enggu nadalan aku na katuntay.
23 Ugaid'a apia ka maitu, na 'bpagagaken aku nengka
enggu lalayun aku nengka pedtapiden.
24 Pedtutulun aku nengka sia pakanggulalan kanu panduan nengka.
Ulian nu entu, na taliman aku nengka enggu badtugen aku nengka.
25 Dala man nasisita ku lu sa sulega, nia tabia na seka.
Dala salakaw sia sa dunia a 'gkapangingalap ku u dikena seka.
26 Na 'gkalubay man su badan ku enggu pamusungan ku
ugaid'a seka a Kadenan i papegkabagel lun enggu seka bu man i nasisita ku taman sa taman.
27 Na apia entain i temangka sa leka na nanget a matay;
su langun na tinemaligkud sa leka na binasan nengka.
28 Ugaid'a sia sa laki, na mapia den a benal amaika su taw na masupeg sa leka a Kadenan.
San aku pabpelindung sa leka a Kadenan a Mapulu
asal'a makapayag ku su langun na makagaip a pinggula nengka.