Su Pangeni-ngeni pantag kanu Kapendatu nu Datu
Sengal'u Sulaiman.
72
Hu Kadenan, ipamandu nengka kanu datu su kabpangukum'engka a wagibenggu su katidtu nengka kanu wata a mama nu datu
2 ka enggu nin makukum sa matidtu enggu wagib su manga taw nengka
enggu su miskinan a manga taw nengka.
3 Pangeni-ngenin ku na su manga palaw na mamelapay sa mapia a sabpet kanu manga taw
enggu su katidtu na mamelapay bun kanu madakel a taw.
4 Pangeni-ngenin ku i tabangan nengka su datu sa kapaninindeg'in kanu manga miskinan
enggu kalipuas'in kanu pamakanasisita a taw
taman sa lupet-lupeten nin su 'bpagumis kanilan.
5 Pangeni-ngenin ku i taman a semigay pan su senang enggu su ulan-ulan na simban ka nu manga tawa
taman den kanu temundug pan a manga muliataw.
6 Su kapendatu nu datu na makailing sa ulan a pakabubu kanu manga utan,
mana manga talitik a pakabubu kanu lupa.
7 Pangeni-ngenin ku i taman sa semebang pan su ulan-ulan na su manga taw
na maguyag-uyag sa matidtu sa kanu timpu nu kapendatu nin
enggu mapia i kapaguyag-uyag'ilan.
8 Pangeni-ngenin ku i kandatuan nin su lagat iganat sa sebangan taman sa sedepan,
iganat sa lawas'a ig'u Yupratis taman kanu tedtab'u dunia.
9 Pangeni-ngenin ku i su manga taw a pegkaleben kanu tawan-tawan a dalepa na makasugiud kanu kaadapan nin,
su manga kuntela nin na mamakadudsum kanu lupa sa katalaw nin kanilan.
10 Pangeni-ngenin ku i su manga datu sa Tarsis enggu manga datu kanu manga punul
na mamananggit silan sa ibpagenggay nilan lun,
su manga datu nu Shibab enggu manga datu nu Sibac
na mamananggit bun silan sa ibpagenggay nilan lun.
11 Pangeni-ngenin ku i su langun nu datu na semugiud kanu kaadapan nin,
su langun nu bangsa na mapapangungulipen sa lekanin.
12 Kagina ibpelipuas'in su manga miskinan amaika pedtawag sa tabang sa lekanin,
pedtabangan nin su manga taw a 'bpagumisen a dala pakadtabang lun.
13 'Gkalat i nanam'in kanu manga taw a da 'gkagaga nin enggu su manga taw a pakanasisita
taman sa ibpelipuas'in silan.
14 Ibpelipuas'in silan kanu manga 'bpagumis enggu kanu mapasang i ukit'in a manga taw
kagina su uyag-uyag'ilan na sangat i kabalapantag'in sa lekanin.
15 Pangeni-ngenin ku i pagkalendun su kapaguyag-uyag'u datu!
Pangeni-ngenin ku i kaenggan sekanin sa bulawan a ebpun sa Shiba.
Lalayun sekanin ipangeni-ngeni nu manga taw
enggu lalayun sekanin pebpalihalan.
16 Pangeni-ngenin ku i su manga kalupan na madakel i masabpet lun
apia su lu kanu manga puntiuk'u manga palaw na mamangunga sa madakel su manga pamumulan nin
a mana su kadakel'u manga kayu sa palaw nu Libanun
enggu mangiseg i kadakel'u manga taw kanu siudad
a mana su kadakel'u manga utan kanu maliwanag.
17 Pangeni-ngenin ku i taman sa semebang pan su senang na di kalipatanan su ngala nu datu taman sa taman,
magkalendem sekanin nu taw.
Pangeni-ngenin ku i sia makanggulalan sa lekanin na kapalihalan su langun na bangsa
enggu edtalun nu manga bangsa i pinalihalan sekanin nu Kadenan.
18 Pugin su Kadenan a Mapulu a Kadenan nu manga taw a Israil,
sekanin bu man i pakagaga penggula kanu langun nu makagaip.
19 Pugin su ingala nin a barakat taman sa taman;
su sigay nin na makapayapat kanu dunia.
Amin! Amin!
20 Na sia bu taman su manga pangeni-ngeni nu Daud a wata-mama ni Yisi.