Su Pangeni-ngeni sa Kadalinding'u Kadenan kanu Taw nin
71
Hu Kadenan a Mapulu, seka i pendedsan ku kanu ginawa ku,di ka pedsuguti a makagkaya aku.
2 Tabangi aku nengka enggu ilipuas aku nengka sia luyud kanu katidtu nengka;
pakikineg aku nengka pan enggu ilipuas aku nengka.
3 Pangeni-ngenin ku i seka i mabaluy a mana watu a lalayun makakelung sa laki
a su mabagel a kuta a makapalipuas sa laki.
Isugu nengka pan i ilipuas aku
ka seka man su watu ku a mabagel a kuta ku.
4 Hu Kadenan ku, ilipuas aku nengka kanu kapegkagaga nu manga dupang a taw,
ilipuas aku nengka kanu tamegesen a manga taw.
5 Hu Kadenan a Mapulu, seka man i inam ku,
iganat pan kanu wata aku na pedsaligan ku den seka.
6 Na iganat sa kinambata sa laki na inisalig ku den i ginawa ku sa leka,
seka man i napaliu sa laki kanu wawatan nu ina ku.
Lalayun ku seka pebpugin.
7 Na su uyag-uyag ku na nabaluy a upaman sa kapaingat kanu madakel a taw,
ugaid'a seka su mabagel a kelung ku.
8 Su ngali ku na di pedtelen sa kapebpugi sa leka,
ipebpayag'in su kabadtugan nengka kanu kagagabian.
9 Di aku nengka temagak amaika matua aku den;
di aku nengka mapadtaday amaika malubay aku den.
10 Kagina su manga kuntela ku na pembibitialan nilan su kaimatay nilan sa laki,
'bpagitungen nilan u panun i kaimatay nilan sa laki
11 sa nia nilan pedtalun na “Pinadtaday den man sekanin nu Kadenan
tembu paneleden tanu sekanin ka sigkemen tanu
ka da den man lemipuas sa lekanin.”
12 Hu Kadenan ku, di aku nengka pedtangkai;
pamagayasi aku den 'gkadtag!
13 Pangeni-ngenin ku i makagkaya enggu mabinasa su manga 'bpanendit sa laki;
isugut'engka sa edsudian enggu makayaya
su pegkiug 'bpamungkaid sa laki.
14 Ugaid'a saki na lalayun su inam ku sa leka
taman sa isegan ku pan su kapugi ku sa leka.
15 Lalayun ipayag'u ngali ku su katidtu nengka
enggu su kabpamelipuas'engka
sa apia nia nin kaaden i di pamun gaid 'gkatengkad'u itungan ku su entu.
16 Hu Kadenan a Mapulu, pugin ku su manga makagaip-gaip a pinggula nengka,
na su dala idsan nin a katidtu nengka bu i ipayag ku.
17 Hu Kadenan, iganat sa wata aku pan na inipamandu nengka den sa laki su manga tanda a kagaipan a pinggula nengka,
na sampay saguna na ipebpayag ku bun su entu.
18 Hu Kadenan, na saguna a matua aku den enggu pegkaputi den su buk ku
na di aku nengka mapadtaday.
Isugut'engka a makapayag ku su kapegkagaga nengka kanu manga temundug pan a muliataw
enggu su kabarakat'engka kanu langun nu mamakatundug pan sa laki.
19 Hu Kadenan, su katidtu nengka na di matengkad i katuntay lun.
Sangat a makagaip su langun na pinggula nengka.
Hu Kadenan, dala man limbang'engka!
20 Apia madakel i inipatala nengka sa laki a kapasang enggu kamalasayan
na imbalingan nengka bun sa laki su bagel ku;
mana aku minatay a uyagen nengka 'bpaluman.
21 Isegi ka pan su kabadtug'engka sa laki,
enggu limpang aku nengka 'bpaluman.
22 Hu Kadenan ku, sabap kanu katidtu nengka
na pugin ku seka sia makanggulalan kanu palabuni-bunian a alpa.
Hu Suti a Kadenan a pedsimban nu manga taw a Israil,
edsengal aku sa pugi sa leka sia makanggulalan kanu palabuni-bunian a kutiapi.
23 Su ngali ku na pakalalis sa kapia na ginawa
a pedsengal sa pugi sa leka,
su atay ku na sangat a 'gkagalaw
sabap kanu kinalipuas'engka sa laki.
24 Na kanu kagagabian na ipayag ku su katidtu nengka
kagina su pegkiug 'bpamungkaid sa laki
na makayaya enggu mabaluga.