Su Pangeni-ngeni sa Kalipuas'u 'Bpamungkaidanan
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Manga Ulak a Lili.” Su nia a Sengal na inisulat'u Daud.
69
Hu Kadenan, ilipuas aku nengkaka su kadalem na nakauma den kanu lig ku.
2 Mana aku pakagaled kanu luan-luan a budta
a dala den 'gkadtimpawan nu ay ku;
mana aku den nakauma kanu kaludan
a pakageled den nu kadalem.
3 Na 'gkalugat aku den 'bpaguguliang sa kabpangeni ku sa leka sa tabang.
Hu Kadenan ku, su bakalengan ku na 'gkamalan den a benal,
su mata ku na malibuteng den i kapegkailay nin
sa kabpagangapa ku kanu tabang'engka.
4 Na su 'gkangabensi sa laki sa dala sabap'in
na nia pan madakel kumin kanu kadakel'u buk ku;
madakel a kuntela i pegkiug 'bpagimatay sa laki sa dala sabap'in.
Ipebpeges'ilan papembalingan sa laki su dikena ku pinanegkaw.
5 Hu Kadenan, katawan nengka man su kadupangan ku;
dikena nakapagena sa leka su manga kabaladusan a pinggula ku.
6 Hu Kadenan a Mapulu a Barakat sa Langun a Kadenan nu manga taw a Israil,
di ka ipedsugut a makagkaya su pedsalig sa leka sabap sa laki;
di ka ipedsugut a makagkaya su manga taw a pedsupeg sa leka sabap sa laki.
7 Ka sabap sa leka na tinemigkel aku sa kapapegkaya sa laki,
sangat man a nakagkayaya aku.
8 Apia su manga lusud ku sa tian na mana salakaw aku a taw kanilan,
ipedtimbang aku nilan sa lapu.
9 Su lilingay ku man kanu walay a 'bpangadapan sa leka na mana apuy a pedtepuk sa laki;
su kabpagumpak'u manga taw sa leka na sia pedtana sa laki.
10 Amaika 'bpaguguliang aku a pedtigkel sa kapegkan
na 'bpagumpaken aku nilan.
11 Na kanu kinambalegkas ku sa saku sa tanda na kapenggagaw sa laki
na naumbal i entu a nadtatawan nilan sa laki.
12 Na su 'bpamagagayan lu kanu bengawan nu siudad na saki i 'bpelibaken nilan,
su 'gkangalangut na saki i dalem'u sengal'ilan a ibpagumpak'ilan sa laki.
13 Hu Kadenan a Mapulu, ugaid'a saki na ipedtalus ku bun su kabpangeni-ngeni ku sa leka sa pakikinegen aku nengka den.
Na sabap kanu 'bpamelapay a sangat a kakalimu nengka na sawal ka su pangeni-ngeni ku sia kanu kutika a 'gkasuatan nengka
ka matidtu ka man kanu kabpamelipuas'engka.
14 Ilipuas aku nengka kanu kapegkageled ku kanu luan-luan a budta,
ilipuas aku nengka kanu 'gkangabensi sa laki
a mana su kabpelipuas'engka sa laki kanu madalem a ig.
15 Di ka pedsuguti a makageled aku nu kadalem
atawa ka makageled aku nu madalem a ig
atawa ka kadtikupan aku nu lupa.
16 Hu Kadenan a Mapulu, sawal ka pan su pangeni-ngeni ku sabap kanu kapianan nu sangat a kakalimu nengka.
Pakikineg aku nengka pan sia luyud kanu lat a nanam'engka.
17 Di ka pedtaligkudani su panunugun nengka,
pamagayasi aku den semawal ka sangat a 'gkapasangan aku den.
18 'Gkadtagi aku nengka den
ka ilipuas aku nengka kanu manga kuntela ku.
19 'Gkatawan nengka bun su kabpagumpak sa laki,
su kapapegkaya sa laki enggu su kabpelusak sa laki;
'gkatawan nengka u entain su manga kuntela ku.
20 Su kabpagumpak'ilan sa laki na pakalupet kanu atay ku,
mana 'gkaawan aku den na inam.
'Bpangilay aku sa malat i nanam'in sa laki ugaid'a dala 'gkatun ku;
'bpangilay aku sa makalimpang sa laki ugaid'a apia sakataw na dala natun ku.
21 Nia pan mula na inenggan aku nilan sa makan a sinimbulan sa duti,
na guna su pakainem aku na inenggan aku nilan menem sa madsem a 'bpaginumen.a
22 Pangeni-ngenin ku i su kapegkan nilan kanu kanduli na mabaluy a makadulat kanilan
enggu su kapegkagalaw nilan na mabaluy a kabinasan nilan.
23 Pangeni-ngenin ku i mangapisek silan
enggu kangalubayan den silan taman sa taman.
24 Ibubus'engka kanilan su lipunget'engka,
ipagedam'engka kanilan su sangat i kapasang'in a lipunget'engka.
25 Pangeni-ngenin ku i awan nilan su pendalepan nilan
enggu dala den 'gkaleben kanu manga balung-balung a tuleda nilan.
26 Kagina 'bpamungkaidan nilan su manga taw a papedtalan nengka sa kasiksan sa kapapedtidtu nengka lun,
pembibitialan nilan kanu ped su kamalasayan a natala nu manga siniksa nengka.
27 Na iuman nengka kanu kabaladusan nilan su langun nu entu
enggu di ka silan mapalipuas.
28 Punas ka den su ngala nilan kanu libelu a sinulatan kanu mamakatalima sa uyag-uyag a da taman nin.
Di ka mamung semulat su ngala nilan kanu manga ngala nu matidtu a manga taw.
29 Hu Kadenan, ugaid'a saki na sangat a 'gkalasay enggu 'gkapasangan
tembu ilipuas aku nengka enggu dalindingi aku nengka.
30 Na pugin ku su ingala nu Kadenan sia makanggulalan kanu kadsengal ku lun;
badtugen ku sekanin sia makanggulalan kanu kadsukul-sukul ku lun.
31 Na kasuatan i entu nu Kadenan a Mapulu sa minuna pan kanu ipegkurban a sapi
atawa ka tudu a sapi.
32 Na amaika mailay i entu nu manga 'bpagumisen na mangagalaw silan.
Na su langun nu pedsupeg kanu Kadenan na makadsisigalaw i pamusungan nilan.
33 Ka pakikinegen man nu Kadenan a Mapulu su pamakanasisita
enggu di nin padtadayn su manga taw nin a nangabilanggu.
34 Su langun na lu sa sulega enggu sia sa liwawaw nu dunia na pugin nilan su Kadenan
taman den kanu langun nu lu kanu lagat na mugi sa lekanin.
35 Kagina ilipuas'u Kadenan su siudad'u Zionb
enggu patindegen nin 'bpaluman su manga siudad'u Yahuda,
ka lu ba 'gkaleben su manga taw nu Kadenan
enggu manggumaked'ilan menem su entu.
36 Na su manga muliataw nilan na mabpusaka nilan su entu
enggu su manga taw a pegkalimu kanu Kadenan na lu bun ba makagkaleben.