Su Sengal kanu Kinapanaban
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
68
Hu Kadenan, embangun ka, ka itagayak'engka su manga kuntela nengka;su 'gkangabensi sa leka na mamakapalalaguy mawa kanu kaadapan nengka.
2 Na mana bun su bel a pakabayug'u sambel, na maitu bun ba i pakaidan nengka kanu manga kuntela nengka.
Mana bun su lansuk a 'gkatunag'u apuy,
na maitu bun ba i kabinasa nengka kanu dupang a taw sia kanu kaadapan nengka.
3 Ugaid'a su matidtu a manga taw na sangat a mangagalaw
kanu kaadapan nengka, sangat a mangapia i ginawa nilan.
4 Edsengali nu su Kadenan, edsengal kanu sa kapugi kanu ingala nin;
edsengali nu sa kapugi lun su sekanin a 'bpageda kanu gabun
a su ingala nin na Kadenan a Mapulu.
Edsisigalaw sa kapugi sia kanu kaadapan nin.
5 Sekanin i nabaluy a Ama nu manga ilu enggu 'bpaninindeg kanu manga balu,
sekanin su Kadenan a lu kanu suti a pendalepan nin.
6 Su 'bpamedtibayu na 'bpagenggan nin sa sakambinabatan a madtagapeda nin,
pabpeliun nin su manga bilanggu a dala kadupangan nin enggu papembantasen nin pan su uyag-uyag'ilan,
ugaid'a su 'bpamedsungkang lun na lu makagkaleben kanu kalupan a sangat i kayaw nin enggu katitik'in.
7 Hu Kadenan, sia kanu kinapangunanan nengka mapaliu kanu manga taw nengka
lu kanu tawan-tawan a dalepa
8 na nagayangkeng su lupa enggu su langit na minubus sa ulan kanu kaadapan nengka
a su Kadenan nu manga taw a Israil a mibpayag kanu palaw sa Sinai.
9 Hu Kadenan, inibubus'engka su ulan a maleges,
pinagkapia nengka 'bpaluman su migkatitik a kalupan a inibpusaka nengka
10 enggu pinagkalebenan nengka kanu manga taw nengka.
Na sia kanu kapianan nengka na inenggay nengka kanu 'gkangapasangan su nasisita nilan.
11 Hu Kadenan a Mapulu, napapait ka sa katigan,
na sangat i kadakel'in a manga babay i minayapat kanu nia a katigan nengka
12 a “Su manga datu enggu su manga sundalu nilan na namakapalalaguy!”
Na pinamagumun nu manga babay nu walay su nangakua a kaaden a nangatagak'ilan.
13 Na apia su manga babay a pedtameng kanu manga lugenan nu manga bili-bili na nakasawit bun,
kinua nilan su inumbal a malapati a nia nin papak na linumbus sa pilak
enggu su manga bumbul'in na linumbus sa bulawan.
14 Na kanu kinatagayak'u Kadenan a Barakat sa Langun kanu manga datu,
na pinaulanan nin sa ilu su palaw a Salmun.
15 Hu seka a nan a palaw nu Basan a malambeg a benala
enggu madakel i puntiuk'in,
16 ngintu ka 'gkadsekelan nengka pan
su palaw a Zion a pinamili nu Kadenan a kagkalebenan nin taman sa taman?
17 Su Kadenan a Mapulu na nakauma kanu Suti a 'Bpagagaman a ebpun kanu palaw nu Sinaib
a ped'in su ngibu-ngibuan a pakakalisa nin.
18 Na linemu sekanin kanu malambeg a palaw,
pidtapik'in su madakel a nabiag kanu kinambunua,
nakatalima sekanin sa kurban kanu manga taw,
apia su manga sinemungkang sa lekanin na migkurban lun. Na lu ba man su Kadenan a Mapulu.
19 Pugin su Kadenan a Mapulu a Kadenan a 'bpelipuas sa lekitanu,
sekanin i pedtabang sa lekitanu kanu manga kamutuan tanu kanu uman-uman gay.
20 Su Kadenan tanu na sekanin su Kadenan a 'bpamelipuas.
Sekanin su Kadenan a Mapulu a Kadenan a 'bpelipuas sa lekitanu kanu kapatay.
21 Nanget man a lupet-lupeten nu Kadenan su manga ulu nu kuntela nin
a pedtalus bun kanu kapembaladusa nilan.
22 Nia kadtalu nu Kadenan a Mapulu na
“Imbalingan ku silan sa dalepa a Basan,
imbalingan ku silan kanu kadaleman nu lagat
23 ka enggu nu maladaw su lugu nilan.
Su manga asu nu na masemu sa kadila nilan kanu lugu nu manga kuntela.”
24 Hu Kadenan, nailay nu manga taw su kapegkuyug'engka sa kinambantas'engka,
su kabpegkuyug'u Kadenan ku a Datu ku 'bpawang kanu suti a walay a 'bpangadapan lun.
25 Na sia kanu unan nin su manga pasesengal enggu sia menem sa luk su manga babay a patatambul
enggu sia menem kanu ulian su manga pebpaguni sa manga palabuni-bunian.
26 Nia nilan ibpamelalis na “Pugin su Kadenan sia kanu madakel a 'gkangalimud,
pugi nu su Kadenan a Mapulu, hu sekanu a tupu nu Israil.”
27 Nia nangunanan na su manaut sa langun a tribu a ebpun kanu tupu nu Buniamin,
pedtundug su 'gkangaunutan a ebpun kanu tupu nu Yahuda kaped'ilan su manga pagidsan nilan a tribu,
entu pan ka su 'gkangaunutan a ebpun kanu tupu nu Sibulun enggu kanu tupu nu Naptali.
28 Hu Kadenan, ipailay nengka su sangat a kabarakat'engka;
ipailay nengka su bagel'engka a mana su pinggula nengka sa lekami paganay.
29 Sabap kanu Suti a 'Bpagagaman sa leka sa Awrusalim
na su manga datu na mamananggit silan sa ipegkurban sa leka.
30 Daway ka su manga kuntela nengka a mana talaw a manga binatang a pegkaleben kanu manga damagi,
apeg den nu manga bangsa a mana manga tudu a sapi a kaped'ilan su manga pipis'ilan.
Daway ka silan taman sa di silan semugiud sa leka enggu menggay sa manga pilak sa leka.
Itagayak'engka su manga bangsa a malilini sa kambunua.
31 Su manga taw a Egypt na mamakauma a mamananggit sa manga galang a inggay nilan sa leka;
su manga taw menem a Itiupia na mamagayas silan mamedsugiud mangadap sa leka.
32 Sekanu a manga taw kanu langun nu pendatuan sa dunia, edsengali nu su Kadenan;
edsengali nu sa kapugi lun su Kadenan a Mapulu
33 a su pendadalaug kanu kawang-kawangan a nangaden kanu entu iganat pan sa ganatan.
Na su suala nin na mana lugung i katanug'in.
34 Ipayag'u su kabarakat'u Kadenan
a pendatu kanu lusud'u Israil;
'gkailay kanu langit su kabarakat'in.
35 Hu Kadenan, makagaip-gaip ka kanu suti a walay a 'bpangadapan sa leka,
seka su Kadenan nu manga taw a Israil
a 'bpagenggay sa kabarakat enggu bagel kanu manga taw nengka.
Pugin su Kadenan!