Su Pugi enggu su Kadsukul-sukul kanu Kapianan nu Kadenan kanu manga Taw
Lu i nia pakatumpa kanu 'gkaunutan nu pasesengal.
66
Sekanu a manga taw sa lusud'a dunia, ilalis'u i kapugi nu kanu Kadenan sa aden kagalaw nin.2 Edsengal kanu sa kapugi pantag kanu kabadtugan nu ingala nin.
Inggay nu sa lekanin su pugi a makadait lun.
3 Edtalu nu sa lekanin i “Hu Kadenan, sangat a makagaip su manga pinggula nengka!
Sabap kanu sangat a kapegkagaga nengka na semugiud su manga kuntela nengka kanu kaadapan nengka.
4 Langun na taw sa dunia na semimba
enggu edsengal sa kapugi sa leka,
edsengal silan sa kapugi kanu ingala nengka.”
5 Na sia kanu, ka ilay nu su pinggula nu Kadenan.
Sangat man a makagaip su pinggula nin kanu manusia!
6 Pinadsisi enggu pinagkamala nin su Maliga a Lagat,
na maitu bun ba su pinggula nin kanu lawas'a ig a linipagan nu manga kaapuan tanu a linemakaw bu silan.a
Na sangat a nangagalaw tanu kanu entu a pinggula nin.
7 Na endatu sekanin taman sa taman sia makanggulalan kanu dala idsan nin a kabarakat'in.
Pedsipatan nin su manga bangsa,
su 'bpamedsungkang lun na di dait a imamasela nilan su ginawa nilan.
8 Hu sekanu a manga bangsa, pugi nu su Kadenan tanu!
Pakatanug'u su kapedsengal'u sa kapebpugi sa lekanin ka enggu 'gkakineg'u manga taw.
9 Pedtiakapan nin su umul tanu
enggu di nin man isugut a makagebpa tanu.
10 Hu Kadenan, binatalu kami nengka
a mana pilak a pinaukit sa apuy asal'a mapagelin.
11 Pinadtaday kami nengka a makua nu litag
enggu inipapamawa nengka sa lekami su maugat a 'bpananggiten.
12 Inisugut'engka i kadakudak sa lekami nu manga kuntela nami,
mana kami nengka pinaukit kanu apuy enggu kanu madalem a ig.
Ugaid'a apia ka maitu na init kami nengka kanu mapia a kalupan.
13 Na lemu aku kanu walay a 'bpangadapan sa leka ka 'gkurban aku sa manga kurban a pedtutungen
ka enggu ku matuman su inibpasad ku sa leka
14 a linemiu kanu ngali ku
kanu timpu a pedtala aku sa kasimuketan.
15 'Gkurban aku sa leka sa pedtutungen a mangasebud a binatang
apeg'u mangapia sa langun a mama a bili-bili a kasuatan nengka i kamut'a bel'in,
'gkurban aku sa manga tudu a sapi enggu manga mama a kambing.
16 Na su langun nu sekanu a aden gilek'in kanu Kadenan, na sia kanu ka pakikineg kanu
ka edtalun ku sa lekanu u ngin i pinggula nu Kadenan sa laki.
17 Na tinemawag aku mangeni sa lekanin sa tabang,
su kapebpugi sa lekanin na sia kanu ngali ku.
18 Na amaika da ku bu man ipangumpaya su kabaladusan ku
kanu Kadenan a Mapulu, na di aku nin pakikinegen.
19 Ugaid'a saben-sabenal a pinakikineg aku nin
enggu sinawal'in su pangeni-ngeni ku.
20 Pugin su Kadenan,
ka dala nin ikias su pangeni-ngeni ku
enggu dala nin iawa su sangat a kakalimu nin sa laki.