Su Kapugi enggu Kadsukul-sukul kanu Mapia a Sabpet
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
65
Hu Kadenan, dait man a pugin nami seka sa siudad a Zionenggu tumanen su ngin i inibpasad'ami sa leka.
2 Seka i pedsawal kanu manga pangeni-ngeni,
semupeg sa leka su langun nu taw.
3 Subela-subela den i kabaladusan nami,
ugaid'a 'bpagampunen kami nengka bun kanu manga kapedsungkang'ami sa leka.
4 Mapia den a benal kanu taw a napamili nengka a mangadap sa leka
enggu makagkaleben kanu walay a 'bpangadapan sa leka.
Na sangat a 'gkapia i ginawa nami kanu manga palihala a 'gkatalima nami kanu walay a 'bpangadapan sa leka
a su Suti a 'Bpagagaman.
5 Hu Kadenan a 'bpelipuas sa lekami,
sinawal'engka su pangeni-ngeni nami sia nakanggulalan kanu makagaip a pinggalebek'engka a kinalipuas'engka sa lekami,
seka su inam'u langun nu taw kanu pat a pisuk'u dunia
apia su manga taw a lu pan pegkaleben kanu lipag'u maulad a kaludan.
6 Pinangaden nengka su manga palaw sia nakanggulalan kanu kabarakat'engka;
'gkailay su sangat a kapegkagaga nengka.
7 Pinatelen nengka su dagus'u bagel'u lagat,
su kabpelumpak'u manga bagel kanu dedsan
enggu su kapegkaguligaw nu manga bangsa.
8 Na sangat a nangagaip su manga taw apia su lu pegkaleben kanu manga susek den a dalepa
sabap kanu makagaip a pinggula nengka,
su manga taw a iganat sa sebangan taman sa sedepan na pakalalis silan sa kapia na ginawa.
9 Pedtiakapan nengka su lupa ka pembubuan nengka sa ulan,
papegkasebuden nengka su entu ka enggu mapia i kapangengetu nu pamumulanen,
na su manga lawas'u ig na pabpemelapayn nin,
papedsabpeten nengka sa mapia su manga taw,
ka entu ba i kahanda nengka a manggula.
10 Pebpagulanan nengka su manga maliwanag a dinadu ka enggu 'gkawasa sa mapia,
pinagkalemek'engka su manga lupa a dinadu kanu talitik a ulan
taman sa pambalilidsekin nengka su inipamamula lun.
11 Sabap kanu kinapambalilidseki nengka kanu lupa na sangat a mapia su manga sabpet,
na apia endaw ka pakandaw na 'bpamelapay su sabpet.
12 Apia su manga utan nu tawan-tawan a dalepa na nabaluy a panadtaban sabap sa migkakasebud su manga utan nin,
su manga bakulud na mana taw a pakalalis sa kapegkagalaw nilan.
13 Su manga mapia a 'bpanadtaban na napenu na manga bili-bili enggu manga kambing,
su kadatalan na napenu-penu na pamumulanen a 'bpagunga,
mana silan manga taw a pakalalis pedsengal sa kapegkapia na ginawa.