Su Pangeni-ngeni sa Kalipuas kanu manga Kuntela
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
64
Hu Kadenan, pakikineg ka pan su ipembuku nu ginawa ku;pangelungi ka su umul ku kanu kapedsingani nu manga kuntela ku.
2 Lindungi aku kanu manga dupang a taw sa kanu mawag a kahanda nilan sa laki,
lindungi aku kanu lumpukan nu mawag i galebek'in a manga taw.
3 Su mawag a kadtalu nu ngali nilan a mana kagalang'a sundang
enggu su pakaduti a kadtalu nilan a mana asad'a busug
4 na ibpagayan nilan pembusug kanu manga taw a dala penggulan nin a mawag,
pedtekawan nilan demun silan pembusug sa dala den gilek'ilan.
5 Pedtatabanga silan sa kapegkahanda nilan sa kanggula sa mawag,
pembitialan nilan u endaw nilan itana su padulat'ilan
sa nia nilan kadtalu na “Da man makasipat sa ngin i penggulan tanu a nia,
6 kagina pibpia-pianan tanu 'gkahanda su nia a kadaluakan!”
Saben-sabenal a su itungan nu taw enggu su atay nu taw na malegen pedtuntayan.
7 Ugaid'a busugen silan nu Kadenan,
na nia nilan katekaw na nangapalian den silan.
8 Na sabap kanu manga mawag a 'bpeliu kanu ngali nilan na mabinasa silan,
na su langun na mamakailay kanilan na makapanentek sa lat a ginawa nilan kanilan.
9 Na su langun nu taw na kaadenan na gilek.
Ipayag'ilan su ngin i pinggula nu Kadenan
enggu lalayun nilan mabpapamikil su entu a pinggula nin.
10 Na su manga taw a matidtu na mangagalaw silan sia kanu Kadenan a Mapulu
enggu mapalindung silan sa lekanin.
Pugin sekanin nu langun nu taw a matidtu i galebek'in.