Su Katadem kanu Kadenan
Su Sengal'u Daud kanu timpu a lu sekanin sa tawan-tawan a dalepa sa Yahuda.
63
Hu Kadenan, seka man su Kadenan ku,sangat a 'gkapangilay ku seka,
su pamusungan ku na sangat a 'gkapangingalap ka nin,
su badan ku na sangat a 'gkatademan ka nin
a mana sia aku kanu mamala den a benal a dalepa a sangat a pakanasisita sa ig.
2 Tembu pegkiugan ku a benal seka masimba kanu walay a 'bpangadapan sa leka
kagina pegkiugan ku 'bpagilay su kabarakat'engka enggu su sigay nengka.
3 Kagina su sangat a kakalimu nengka na nia pan mapia kumin kanu uyag-uyag,
tembu su ngali ku na pebpugi sa leka.
4 Kagina ka maitu na pugin ku seka taman sa bibiag aku pan,
ikayang ku su manga lima ku sa kasimba ku sa leka.
5 Nasukul a benal su ginawa ku a mana nausug keman kanu mapia a pegken sia kanu kanduli,
pugin ku seka sia makanggulalan kanu magalaw a sengal.
6 Na sia kanu kabpagiga ku na seka bu i kalendeman ku,
kanu kalalamagan na seka bu i dalem'u pamikilan ku.
7 Kagina lalayun aku nengka pedtabangan,
magalaw aku a pedsengal ka katawan ku i pedtiakapan aku nengka a mana su kabpelekep'u ina na manuk kanu pipis'in.
8 Mapalalayun aku san sa leka,
pegkelungan aku nu kawanan a lima nengka.
9 Ugaid'a su pegkahanda kanu umul ku na mabinasa,
lu silan makabpawang kanu dalepa nu namamatay.
10 Mamamatay silan kanu kambunua,
su bangkay nilan na pangen nu manga asu sa damakayu.
11 Ugaid'a su datu na magalaw kanu pinggula nu Kadenan,
na su langun nu mibpasad kanu ingala nu Kadenan na pugin nilan su Kadenan,
ugaid'a su langun na pedtalu sa kabudtud na tikupen nin su ngali nilan.