Su Sengal a Kapedsalig kanu Kadenan
Lu i nia pakatumpa kanu 'gkaunutan nu pasesengal a si Yidutun. Su nia a Sengal na inisulat'u Daud.
62
Na su Kadenan bu i 'gkapangingalap'u ginawa ku,su kalipuasan ku na ebpun sa lekanin.
2 Sekanin bu man su masela a watu a kelung ku enggu kalipuasan ku,
sekanin su kuta ku tembu di aku magkeleng-keleng.
3 Sekanu a manga kuntela ku, na ngin i kauget'a katelen nu munu sa laki?
Na mana aku man lending a mangagan den malundus atawa ka alad a mangagan den mageba.
4 Nia nilan bu kahanda na makapababa aku nilan kanu balapantag a nambetadan ku.
'Gkalilinian nilan a benal su kapembudtud;
nia 'bpeliu kanu ngali nilan na kapamalihala
ugaid'a su dalem'u atay nilan na kapedsinta.
5 Sia bu man kanu Kadenan makapangintelenen su ginawa ku,
kagina su inam ku na ebpun sa lekanin.
6 Sekanin bu man su mana masela a watu a kelung ku enggu kalipuasan ku,
sekanin su kuta ku tembu di aku magkeleng-keleng.
7 Sia kanu Kadenan su kalipuasan ku enggu su kabadtugan ku;
sekanin su mabagel a watu ku,
sekanin i kelung ku.
8 Sekanu a manga taw nu Kadenan, na salig kanu sa lekanin kanu langun na timpu;
edtalu nu sa lekanin su langun na kamutuan nu,
ka su Kadenan man i pendedsan tanu sa entu.
9 Na magidsan pan i badtug a taw enggu dikena badtug
na di kasaligan,
na amaika timbangen silan, na isa bu silan a mapegkag pan sa sambel.
10 Da kanu semalig kanu kuleta a dikena mapia i kinakua lun
atawa ka pinanegkaw;
na amaika 'gkadakel i kakawasan nu, na di nu mapandatu kanu ginawa nu su entu.
11 Na dikena bu man nakaisa i kinakineg ku a pidtalu nu Kadenan i su kabarakat na lu sa lekanin,
12 su sangat a kakalimu na lu sa lekanin.
Ka balasan man nu Kadenan su langun na taw
sia luyud kanu ngin i pinggalebek'in.