Su Pangeni-ngeni sa Kapangelung'u Kadenan
Lu i nia pakatumpa kanu 'gkaunutan nu pasesengal a nia usalen na palabuni-bunian a aden iket'in. Su nia a Sengal na inisulat'u Daud.
61
Hu Kadenan, pakikineg ka su kapedtawag ku 'bpangeni sa leka sa tabang;pakikineg ka su pangeni-ngeni ku.
2 Iganat kanu tedtab'u dunia na 'bpananawag aku sa leka
a 'gkalubayan den i 'gkanggiginawa ku.
Agak aku nengka kanu masela a watu a malambeg pan sa laki
ka kanu untul'u entu na di aku kagkaidan;
3 kagina seka man i kelung ku
a su mabagel a tantawan a kelung ku kanu manga kuntela ku.
4 Suguti aku nengka a makagkaleben kanu walay a 'bpangadapan sa leka taman sa taman.
Suguti aku nengka a kalekepan nengka a mana su kabpelekep'u ina na manuk kanu pipis'in.
5 Hu Kadenan, nakineg'engka man su inibpasad ku sa leka;
inenggan aku nengka sa manga palihala a ipebpusaka nengka kanu apia entain a aden gilek'in kanu ingala nengka.
6 Na saki a pinamili nengka a datu, na pagkalendu ka su umul ku.
Pagkauget ka su kandatu ku sia makanggulalan kanu manga muliataw ku!
7 Hu Kadenan, suguti ka a makandatu aku taman sa taman a pedtapiden nengka;
tiakapi aku nengka sia makanggulalan kanu sangat a kakalimu nengka enggu katidtu nengka.
8 Na amaika maitu, na lalayun ku seka edsengalan sa pugi kanu ingala nengka,
uman-uman gay na inggulalan ku su manga inibpasad ku sa leka.