Su Pangeni-ngeni sa Kalipuas kanu manga Taw a 'Gkatabanan
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Susan-Idut.” Su nia a Sengal na panduan a inisulat'u Daud sa kanu kinauma ni Yuab a 'gkaunutan nu manga sundalu nin a ebpun kanu kinaimatay nin kanu sapulu enggu dua ngibu a manga taw a Idum lu kanu kadatalan a dalepa a bedtuan sa Timus. Su nia na kanu timpu nu kinambunua nilan kanu manga taw a Aram-Naharaim enggu manga taw a Aram-Subal.a
60
Hu Kadenan, inikias kami nengka den, tinebped'engka su manga pangelung'ami.'Gkalipungetan kami nengka,
ugaid'a saguna na 'bpangenin nami i imbalingan nengka 'bpaluman su bagel'ami!
2 Kinuyung'engka su kalupan taman sa pinambutekad'engka;
'bpangenin ku i padtikup ka pan su manga butekad'in, ka 'gkalundus den su kalupan.
3 Sangat a linasay nengka su manga taw nengka;
mana kami nengka pinainum sa makalangut a nakapandulay-dulay sa lekami.
4 Ugaid'a kanu manga taw a aden gilek'in sa leka na inipulu nengka su pandi
a tanda sa kandidilimudan nilan sa timpu na kambunua
asal'a di masugat'u busug.
5 Pakikineg kami nengka pan enggu tabangi kami sia kanu kapegkagaga nengka
ka enggu malipuas su sekami a manga ipegkalimu nengka.
6 Na inibpasad'u Kadenan lu kanu suti a walay nin
i “Manaban aku man. Na baden ku su dalepa a Sikim,
enggu embad-baden ku su kadatalan nu Sukut ka ipangenggay ku kanu manga taw ku.
7 Su dalepa a Giliad enggu Manasi na laki bun,
su dalepa a Ipraim i mabaluy a kapasitib ku,
su dalepa a Yahuda i mabaluy a tungkedc ku.
8 Su dalepa a Muab i mabaluy a palanggan a pembuanawand ku
enggu su dalepa menem a Idum i mabaluy a 'bpagidtugan ku kanu talumpa ku.e
Na ilalis ku su kapanaban ku lu kanu manga taw a Pilistin.”
9 Na entain ba i mananggit sa laki kanu inalad a siudad?
Entain ba i temutulu sa laki kanu dalepa a Idum?
10 Hu Kadenan, ngintu, inikias kami nengka den?
Ngintu, di nengka den tabangan su manga sundalu nami kanu pembunuan?
11 Hu Kadenan, tapid kami nengka sa kambunua kanu manga kuntela nami
ka da man katagan nin su tabang'u manusia.
12 Na sia kanu tabang'engka na manaban kami;
seka i mapalusak kanu manga kuntela nami.