Su Pangeni-ngeni sa Kalipuas sia kanu manga Kuntela
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Di Binasan.” Inisulat'u Daud su nia kanu timpu a kinasugu ni Saul kanu manga taw nin sa kadsipat'ilan kanu walay nu Dauda ka enggu nilan kaimatayan.
59
Hu Kadenan ku, ilipuas aku nengka kanu manga kuntela ku;kelungi aku kanu manga pembunu sa laki.
2 Ilipuas aku nengka kanu manga taw a penggula sa mawag;
ilipuas aku nengka kanu manga taw a talibunu.
3 Hu Kadenan a Mapulu, ilay ka! 'Bpagayanan aku nilan asal'a matay aku nilan.
Su manga taw a mapasang i ukit'in na mindidilimudan sa kalusud'ilan sa laki
apia dala pinggula ku a mawag.
4 Adil den a benal silan sa kalusud'ilan sa laki apia dala pinggula ku a mawag kanilan.
Edtindeg ka, ka tabangi aku nengka, ilay ka pan su 'gkanggula ku.
5 Hu Kadenan a Mapulu a Barakat sa Langun a Kadenan nu manga taw a Israil,
embangun ka, ka siksa ka su manga ped a bangsa a di pedsimba sa leka,
di ka den 'bpelati sa nanam su manga matipu a pegkahanda sa mawag.
6 Uman magabi na pembalingan silan
a mana manga asu a 'bpamedsangungu a 'bpelibet kanu siudad.
7 Ilay ka u ngin i kangadtalu a 'bpameliu kanu manga ngali nilan.
Su kangadtalu nilan na magalang pan sa sundang
a nia 'gkadtalu na ginawa nilan na “Dala bun pakakineg sa lekitanu.”
8 Ugaid'a seka, Hu Kadenan a Mapulu, na pedtatawan nengka bu silan;
pedsudian nengka su langun na bangsa a di pedsimba sa leka.
9 Hu Kadenan, seka man i bagel ku! 'Bpagingapa aku sa leka
kagina seka man i kuta ku.
10 Sabap kanu sangat a kakalimu nengka sa laki na isugut'engka a makalipuas aku;
isugut'engka a kambamatan ku su kapalusak'engka kanu manga kuntela ku.
11 Ugaid'a di ka silan babaya 'bpagimatayi ka enggu di kalipatanan nu manga taw ku u panun i kinasiksa nengka kanilan.
Hu Kadenan a Mapulu a pegkelung sa lekami, sia makanggulalan kanu kabarakat'engka na itagayak'engka silan taman sa makalusak silan.
12 Na sabap kanu 'bpameliu kanu ngali nilan a kabaladusan
na isugut'engka a makua silan na padulat'u kapulu na muletad'ilan,
ka nia bu 'bpameliu kanu ngali nilan na su kabpamelawak enggu kabudtud.
13 Ibped-ibped ka silan minasa kanu lipunget'engka
taman sa madala silan.
Na amaika maitu na katawan nu manga taw kanu lusud'u dunia
i seka man a Kadenan i pendatu kanu manga taw a Israil.
14 Uman magabi na pembalingan silan
a mana manga asu a 'bpamedsangungu a 'bpelibet kanu siudad.
15 'Bpelalakaw silan ka 'bpangilay silan sa makan,
mana silan asu a 'bpanangungu amaika di silan 'gkausug.
16 Ugaid'a saki na edsengal aku pantag kanu kabagel'engka,
uman mapita na edsengal aku pantag kanu sangat a kakalimu nengka,
kagina seka man i kuta ku,
seka man su kelung ku sa kanu timpu na kamasengetan.
17 Hu Kadenan, seka man i bagel ku, edsengal aku sa pugi sa leka
kagina seka man i kuta ku a Kadenan a sangat i kakalimu nin sa laki.