Su Kadenan i Kemukum kanu Dunia
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Di Binasan.” Su nia a Sengal na inisulat'u Daud.
58
Sekanu a 'gkangaunutan, ngintu, wagib ba su kukuman nu?Kinukum'u ba sa matidtu su manga taw?
2 Dikena! Kagina su 'gkagkahanda nu atay nu na kanggalebek sa mawag.
Su manga lima nu na penggalebek sa kadaluakan sia kanu liwawaw nu dunia.
3 Su dupang a taw na nakasibay den man iganat pan kanu kinambata lun;
budtuden den silan iganat pan kanu kinagemaw nilan.
4 Mana silan manga bisa a nipay,
mana silan tambengel a dalepu a di miug makikineg,
5 ka di nilan 'bpakikinegen su suala nu mategel a pembibit kanilan,
apia mategel pan i 'bpangulu kanilan.
6 Hu Kadenan a Mapulu, tibpud ka su manga ngipen nilan
a mana manga bagang'a manganguda a alimaw!
7 Isugut'engka a madala silan a mana su ig a initapuyak a sinemenep mangagan kanu mamala a lupa,
isugut'engka a malupet silan a mana su busug a nadsalupet.
8 Isugut'engka a makailing silan kanu bayukung a 'gkatunag sa kabpananap'in
atawa ka su wata a da makasegad sa kinagemaw nin.
9 Malengkas pan sa kagkayaw na kuden a linalegan sa mabagel a apuy
i kaibped'u Kadenan mawa kanilan.
10 Na su matidtu a manga taw na makadsisigalaw amaika mailay nilan den a sulian nu Kadenan a Mapulu su manga dupang a taw
enggu maladaw na manga ay nilan den su lugu nu manga dupang a taw.
11 Na nia madtalu nu manga taw na “Natalatantu a aden balas'u manga matidtu a taw;
natalatantu a aden Kadenan a pegkukum kanu dunia.”