Su Pangeni-ngeni sa Katabang'u Kadenan kanu Taw a 'Bpamungkaidanan
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Di Binasan.” Inisulat'u Daud su nia kanu timpu a kinapalalaguy nin kanu Saul lu kanu takub.
57
Hu Kadenan, lati aku pan sa nanamkagina san aku man pabpelindung sa leka,
mapalekep aku sa leka a mana su kabpelekep'u ina nu manuk kanu pipis'in,
taman a di makalipus su pakabinasa.
2 Hu Kadenan a Mapulu sa Langun, pedtawag aku 'bpangeni sa leka sa tabang,
Hu Kadenan, seka i pedtuman kanu kahanda nengka sa laki.
3 Na ganat sa sulega na isugu nengka su kalipuasan ku.
Pagkaya ka su manga taw a pabpelusak sa laki.
Ipagedam'engka sa laki su sangat a kakalimu nengka enggu su katidtu nengka.
4 Nalibet aku nu manga kuntela ku
a mana silan manga alimaw a pegkiug a benal pembusaw kanu sapu nu manusia;
su manga ngipen nilan na mana dilek enggu asad'a busug,
su manga dila nilan na mana kagalang'a sundang.
5 Hu Kadenan, pugin su kabarakat'engka san sa sulega,
ipailay nengka su sigay nengka kanu lusud'u dunia.
6 Sangat a 'gkalidu i ginawa ku
kagina su manga kuntela ku na linitagan aku nilan.
Kinemalut bun silan sa madalem kanu 'bpagukitan ku,
ugaid'a silan bun i naulug kanu entu.
7 Hu Kadenan, pedsalig aku sa leka sa dala kandua-dua nin,
senep sa atay su kabpaginugut ku sa leka.
Edsengal aku sa pugi sa leka.
8 Pagedamen ku su ginawa ku.
Gemedam aku a pabpaguni sa palabuni-bunian a alpa enggu kutiapi a pugi sa leka.
Embangun aku unan pan nu kasebang'u senang.
9 Hu Kadenan a Mapulu, pebpugin ku seka sia kanu manga bangsa
enggu pedsengal aku sa pugi sa leka sia kanu madakel a taw.
10 Kagina su sangat a kakalimu nengka na nakasugku kanu langit i kapulu nin;
su katidtu nengka na nakauma kanu kawang-kawangan.
11 Hu Kadenan, pugin su kabarakat'engka san sa sulega,
ipailay nengka su sigay nengka sia kanu lusud'u dunia.