Su Pangeni-ngeni sa Kasalig kanu Kadenan sa Timpu na Kabpamungkaid
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Malapati sa Masela a Kayu a Tiribintu lu sa Mawatan a Dalepa.” Inisulat i nia nu Daud ulian nu kinasigkem sa lekanin nu manga taw a Pilistin sa dalepa a Gat.
56
Hu Kadenan ku, lati aku sa nanam kagina ibpelusak aku nu manga kuntela ku;kagagabian na 'bpagumisen aku nilan bu.
2 Na di aku nilan pedtelenan pabpelusak,
ka madakel man silan a pembunu sa laki.
3 Hu Kadenan a Mapulu sa Langun, uman aku 'gkagilekan
na san aku pedsalig sa leka.
4 Hu Kadenan, pebpugin ku seka sabap kanu pasad'engka,
di aku 'gkagilekan kagina pedsalig aku sa leka.
Na ngin paman i manggula nu manusia sa laki?
5 Na kanu kagagabian na papedsibayn nilan bu su ngin i manga kadtalu ku;
lalayun aku nilan pegkahandan sa mawag.
6 Na mindidilimudan silan ka namagena,
nia nilan bu 'bpagilayn na su langun na penggulan ku,
ka 'bpagangapan nilan bu su timpu a kaimatay nilan sa laki.
7 Sabap sa daluaka silan na di ka ipedsugut a kapalalaguyan nilan su manga kadaluakan nilan a galebek;
Hu Kadenan, binasa ka silan kanu mapasang a lipunget'engka.
8 Na 'gkatawan nengka man su lidu na ginawa ku;
'gkadsima nengka man su kabpaguguliang ku.
Dikena ba inisulat'engka su entu kanu 'bpanulatan nengka a libelu?
9 Hu Kadenan, su manga kuntela ku na pamakadsunud
amaika pedtawag aku 'bpangeni sa leka sa tabang.
Na 'gkatawan ku su entu kagina seka man i tampil ku.
10 Hu Kadenan, pebpugin ku seka sabap kanu pasad'engka,
Hu Kadenan a Mapulu, lalayun ku seka pebpugin sabap kanu pasad'engka.
11 Di aku 'gkagilekan kagina seka i pedsaligan ku.
Na ngin pan ba i manggula nu manusia sa laki?
12 Hu Kadenan, tumanen ku man su manga inibpasad ku sa leka,
'gkurban aku sa kurban a kadsukul-sukul sa leka.
13 Kagina inilipuas aku nengka kanu kapatay.
Da nengka isugut a makagebpa aku,
asal'a makapaguyag-uyag aku sia kanu kaadapan nengka a Kadenan
sia luyud kanu sigay nengka a 'bpagenggay sa uyag-uyag.