Su Pangeni-ngeni nu Taw a Tinipu nu Pakat'in
Lu i nia pakatumpa kanu 'gkaunutan nu pasesengal a nia usalen na palabuni-bunian a aden iket'in. Su nia a Sengal a mapia i kinaumbal lun na inisulat'u Daud.
55
Hu Kadenan, pakikineg ka pan su pangeni-ngeni ku,di ka pedtaligkudani su kabpamagayuk ku sa leka 'bpangeni sa tabang.
2 Pakikineg aku pan enggu sawal aku pan,
sangat man a 'gkalingasa i ginawa ku kanu manga buku nu ginawa ku.
Di den pakatelen i manggiginawa ku
3 sabap kanu kadtalu sa laki nu manga kuntela ku
enggu su kapapegkapasang sa laki nu manga daluaka.
Ka pedsamuken aku nilan man
enggu sangat a 'gkabensian aku nilan.
4 Pegkiab-kiab i pamusungan ku
enggu pegkukuken aku na gilek sa kapatay ku.
5 'Gkagilekan aku a benal enggu pegkegkel su badan ku sa gilek
ka sangat man a 'gkagilekan aku.
6 Na nia nadtalu nu ginawa ku na “Amaika bu man ka aden manga papak ku a mana su malapati
na lemayug aku den ka enggu aku makapangilay sa kapangintelenan ku.
7 Endadalayug aku sa mawatan
ka lu aku endadalepa kanu tawan-tawan a dalepa.
8 Na mamagayas aku mangilay sa kalindungan ku
kanu mabandes a sambel enggu bagyu.”a
9 Hu Kadenan a Mapulu, bulibug ka pan su manga kadtalu nilan enggu ungen ka su manga kahanda nilan,
kagina 'gkailay ku su kadaluakan enggu su kabpamagukag kanu siudad.
10 Magabi sa malamag na lu silan kanu untul'u alad
ka 'bpelibeten nilan su siudad
a penggula sa kawagan enggu kasimuketan.
11 Su kabinasan na apia endaw den kanu siudad,
su kabpagumis enggu su kasalimbut
na 'gkailay kanu manga lalan nu entu.
12 Na katigkelan ku paman
amaika su manga kuntela ku i pedsudi sa laki,
kalidasan ku paman
amaika su 'gkabensi na su papegkaya sa laki.
13 Ugaid'a nia mapasang sia na su pagidsan ku a pakat ku a benal
enggu tagapeda ku i pedsudi sa laki.
14 Paganay na mapia pan a benal i kapedsebung'ami dua a 'bpakat,
pedtagapeda kami pan 'bpelu kanu walay a 'bpangadapan kanu Kadenan a lu kanu madakel a taw.
15 Na nia ku mapangeni-ngeni na makatekaw makauma su kapatay kanu manga kuntela ku,
makalebeng silan a bibiag kanu pakubulan,
kagina nia pendatu kanu ginawa nilan enggu kanu pegkalebenan nilan na su kadaluakan.
16 Ugaid'a saki na pedtawag aku 'bpangeni sa tabang kanu Kadenan a Mapulu,
na ibpelipuas aku nin mambu.
17 Magidsan pan i mapita, maudtu enggu magabi
na ibpananawag ku sa lekanin su manga buku nu ginawa ku,
na 'bpakikinegen nin mambu su suala ku.
18 Na ibpelipuas aku nin enggu pedtiakapan aku nin
asal'a di aku kagkaidan kanu kapembunua ku,
apia madakel pan a benal i kuntela ku.
19 Na 'bpakikinegen aku man nu Kadenan a 'bpagagayan kanu kulesi nin iganat pan sa ganatan.
Ibpelusak'in su manga kuntela ku
kagina di bun silan pembagu kanu manga ukit'ilan
enggu di nilan ipegkagilek su Kadenan.
20 Na su danden a entu a pakat ku
na tinipu nin su manga pakat'in,
dala sekanin embalituman kanu manga pasad'in.
21 Mapia i sanad'a kangadtalu nin,
ugaid'a su pamusungan nin na nia nin dalem na kabensi,
su kadtalu nin na malemek pan sa gapas,
ugaid'a nia nin kabantang na su kadtalu nin na pakapali a mana kagalang'a sundang.
22 Na idedsa nengka kanu Kadenan a Mapulu su manga pakalingasa kanu ginawa nengka
ka tiakapan ka nin man;
di nin a benal isugut a magkeleng-keleng su manga pinapagikelas'in.
23 Ugaid'a idtug'u Kadenan su manga taw a daluaka
kanu kalut a madalem.
Su manga taw a talibunu enggu tagakalen
na di bun gaid 'gkauget i umul'ilan ka mangagan bun silan matay.
Ugaid'a saki, na pedsalig aku sa leka.