Su Kukuman nu Kadenan kanu Tagakalen a Taw
Lu i nia pakatumpa kanu 'gkaunutan nu pasesengal. Su nia a Sengal a mapia i kinaumbal lun na inisulat'u Daud sa kanu kinapanudtul'i Duig a taw a Idum kanu Saul sa nia nin lun pidtalu na “Su Daud na linemu kanu walay ni Abimilik.”
52
Hu seka a taw a mabagel,ngintu ka ibpemamasela nengka su galebekan nengka a mawag?
Su sangat man a kakalimu nu Kadenan na dala kapegkapupus'in.
2 Pegkahandan nengka sa kabinasan su ped a taw,
su dila nengka na mana kagalang'a gelat
enggu lalayun ka 'bpagakal.
3 Nia nengka kalilinian na mawag kumin kanu mapia,
nia nengka tinemu i kabudtud kumin kanu kadtalu sa bantang.
4 Hu su seka a nan a tagakalen,
na nia nengka kalilinian na su manga kadtalu a makabinasa.
5 Ugaid'a su Kadenan na binasan ka nin taman sa taman,
kuan ka nin ka guyuden ka nin lemiu kanu walay nengka,
iawa ka nin kanu dalepa nu manga bibiag.
6 Na mailay i entu nu matidtu a manga taw
enggu mangagaip silan taman sa edtatawan ka nilan sa nia nilan edtalun na
7 “Ilay nu su taw a nia a di pedsalig kanu Kadenan
ka nia nin pedsaligan na su manga kakawasan nin
enggu pembagel sekanin sa ukit a kapendupang'in kanu ped.
8 Ugaid'a saki na mana aku kayu a ulibus a mapia i kabpaguyag-uyag'in
sia kanu walay a 'bpangadapan kanu Kadenan.
Pedsalig aku kanu sangat a kakalimu nu Kadenan
taman sa taman.
9 Hu Kadenan, di mapupus i kadsukul-sukul ku sa leka
sabap kanu manga pinggula nengka.
Na sia kanu kaadapan nu kasaligan a manga taw nengka
na ipayag ku su kapianan nu ingala nengka.